一個月入萬元嘅年輕人，想買一個三百呎豆腐膶嘅單位，有咩符弗？好簡單啫，只要佢學似啲蟬咁樣餐風飲露，全無消費，等足十年、八年或者有機會儲夠首期嘅，如果父母有米可以資助少少，仲可以提前實現置業夢添。
唔係誇張，今時今日樓價高處未算高，年輕人想置業，如果唔係有父母幫手，睇怕都要中六合彩至得，唔怪得早幾日史上最強六合彩，全城為之瘋狂啦﹗不過咁，中六合彩嘅機會始終好渺茫，比較實際嘅做法係落力啲捽班高官，叫佢哋畀心機做好份工。呢，運輸及房屋局局長張炳良尋日出席一個房屋論壇時，就畀幾十名市民狙擊嘞，佢哋批評港府迷戀「大市場、小政府」模式，將房屋同土地視作可炒賣嘅商品，搞到樓價飛升，基層特別係年輕人住屋權利被剝削；佢哋建議當局取消公屋計分制，並倣效外國興建只可以住唔可以賣嘅社會房屋，話咁做可以令單身青年易啲上樓喎。
即係咁，香港始終係資本主義社會，為買賣房屋設太多限制，爭議同阻力肯定好大，未必可行，之但係年輕人上車難係擺喺眼前嘅事實，政府點都有責任諗計拆掂佢。可惜吖，張炳良大耍語言偽術，呢頭話知道家陣房屋供求失衡、租金樓價高企、劏房遍地開花等問題非常嚴重，同情年輕人嘅苦況，嗰頭又話港府冇「點地成屋」嘅魔術棒，希望社會畀啲耐性，等待政策成效喎。佢老哥嘅意思，就係叫年輕人繼續等啊等。
喂，咪玩啦。港府話要解決住屋問題超過十年，前特首貪曾胡混度日就唔講啦，現屆政府開口埋口房屋問題係施政重中之重，咩寸土必爭呀、見縫插針呀、雙辣招呀，口號多多，弊在有姿勢冇實際。呢，私人住宅售價已經連續三個月創歷史新高，特別係中細價樓交投急升，上車盤屢創癲價，所謂「辣招」到底有幾辣，唔使多講喇啩。
話時話，以前公屋就話係弱勢階層嘅福利，近年開始成為年輕人置業嘅水泡，輪候上樓嘅不乏擁有學士、碩士學位嘅高學歷人士，搞到公屋輪候冊大排長龍。呢，即使係位處冇雷公咁遠又或者避之則吉嘅凶宅，家陣一樣成為搶手貨。唉，有頭髮冇人想做瘌痢，年輕人唔理好醜，但求就手，講嚟講去咪因為買樓太難，租樓太貴囉。
正如京官話齋，房屋問題唔單止係民生問題，處理唔好隨時演化成政治問題。好多年輕人連自己都幾乎養唔掂，莫講話買樓，連結婚生仔都唔敢諗，佢哋睇唔到前景，搵唔到出路，咪愈來愈激進，郁吓就搞抗爭衝擊囉。社會泛政治化，香港淪為示威之都，講到底都係港府無能造成！