大家都知道，澳門係洗黑錢天堂，咁一水之隔嘅香港又點呢？如果你以為香港冇賭場，洗錢唔容易，咁就大錯特錯嘞。
話說內地反腐風暴來勢洶洶，洗黑錢活動成為嚴打目標之一，藏污納垢嘅澳門首當其衝，下月一日起將會撤銷賭場內所有銀聯終端機，希望封堵內地資金非法流入喎。唔講唔知，去年透過非法碌卡而流入賭場嘅資金達到四百億元人民幣，你話洗黑錢活動有幾猖獗吖？不過咁，你有張良計，佢有過牆梯，今時今日洗錢門路多多，唔一定要喺賭場啫，好簡單，透過賭場附近嘅當舖、商舖或珠寶店嘅銀聯機碌卡購物，咪一樣可以套取現金。唔怪得有人質疑澳門當局多此一舉，掩耳盜鈴喇。
正所謂，一污俱污，港澳各有各亂，澳門洗錢活動猖獗，香港亦唔好得去邊嘅咋。內地當局話就話嚴打洗黑錢，對旅客境外提款有嚴格規定，例如銀聯借記卡每日最多只可提取等值一萬元人民幣現金，但事實係上有政策，下有對策，呢啲規定純屬掩耳盜鈴。本報明查暗訪發現，好似澳門嘅碌卡套現行為早就殺入香港，唔少商戶向持銀聯卡嘅內地客提供類似服務，然後收取百分之五至二十嘅手續費。套現招數有三：一，直接套現，毋須購物；二，碌卡購物，物件即時典當；三，即買即賣，碌卡購物後再以九五折賣畀商戶。
呢，記者早前佯裝成內地旅客，持銀聯卡到油尖旺一帶了解，發現部分商戶以不同手法提供各種套現服務。好似旺角一間鐘錶店咁吖，記者查問以銀聯卡購物後可唔可以即時退貨取回現金，對方表示毋須購物亦可提供套現服務，但就要收取一成手續費，仲話十萬八萬都冇問題，而且絕無手尾添。
係咪真係無手尾？當然唔係，正如法律界人士話齋，顧客以信用卡套現，會被視為進行虛假交易，顧客及商戶都可能被控串謀詐騙，最高判監十四年；仲有吖，如果套現行為證明同洗黑錢有關，商戶仲可能被控協助教唆洗黑錢添，最高亦係判監十四年，唔講得笑。唔怪得有啲商戶對套現客來者不拒，有啲商戶就只為熟客服務，亦有商戶採用迂迴方法，要求套現客買貨後幾分鐘至返嚟賣貨，一句講晒，八仙過海各顯神通。
所以話，蝕本生意冇人做，殺頭生意有人做。澳門洗錢天堂早就臭名遠揚，估唔到香港只係五十步笑一百步，講起真係醜怪。對於咁明顯嘅監管漏洞，當局究竟有冇諗辦法堵塞呢？香港假假哋都係金融中心，唔通真係自甘墮落？