孔老夫子話過，事君盡禮，人以為諂也。乜嘢意思？通俗啲講，侍奉上司禮數周到，會令人認為阿諛奉承，亦即係擦鞋咁解。二千幾年前嘅官場已經盛行擦鞋文化，今日更加唔例外，尤其係香港消防官僚，擦鞋功夫認咗第二，相信冇人敢認第一。
嗱，話口未完又嚟喇。任內劣迹斑斑、屢爆醜聞而被指領導無方嘅消防處處長陳楚鑫將於本月下旬提早退休，消防處準備隆而重之替佢大搞退休騷，連日來出動近百名消防員喺沙田消防局綵排「歡送大龍鳳」，既有浩浩蕩蕩嘅步操，又有高空救火嘅表演，仲有救護員架開帳篷為傷者進行急救等等，直情好似拍戲咁，令人嘆為觀止。最離譜嘅係，消防處為咗擦鞋，竟然將新車留喺沙田消防局做綵排布景板，反而向其他分局借用車齡達十五年嘅舊型消防車去救火救人。
正如有位消防員話齋，呢啲舊型消防車全部唔符合歐盟五型環保車輛排放標準，政府淨係識得叫市民更換新車，反而用來救火救人嘅車輛就甩皮甩骨，睇見都眼火爆。其實，老爺消防車係咪環保仲係事小，隨時跪低先至事大，如果延誤救火救人，邊個孭鑊先？
咁都未算吖，沙田消防局本來有三個用作核生化洗消等救援用途嘅貨櫃，因為要騰出地方替陳楚鑫搞退休騷，居然將三個貨櫃擺去小瀝源消防局，而用來拖動貨櫃嘅勾車就留喺沙田。試諗吓，萬一發生核生化事故，消防首先要從沙田派車到小瀝源攞櫃，然後至可赴援，估計最少延誤六至八分鐘，費時失事，累人累物，你話係咪攞人命嚟較飛吖？
講開又講，消防處搞呢啲爛騷都唔係第一次嘅喇，每逢處長退休，例牌大搞歡送大龍鳳。兩年幾前之嘛，前任處長盧振雄退休，各總區爭相大搞歡送活動，前線消防員被迫出席，高層擦鞋，基層受罪，搞到怨聲載道。所以話，江山易改，本性難移，消防官僚嘅擦鞋文化已經唔係一朝一夕，而係一代傳一代，一蟹不如一蟹。
冇錯，擦鞋文化係中國人嘅傳統，歷史悠久，正如神州大地，一個二個貪贓枉法嘅狗官咪就係擦鞋文化嘅產品囉。之不過，好似香港消防官僚咁擦鞋當食飯，肉麻當有趣，咁就真係少見咯，尤其係為咗擦鞋而罔顧人命，更加係聞所未聞。老實講吖，陳楚鑫管理無方，搞到消防處烏煙瘴氣，舊年仲被審計署炮轟十宗罪添，而佢本身更加係醜聞多多，臭名遠播，做咗處長兩年就要提早退休，咁嘅庸官早走早着喇，歡送喎，送瘟神就真！