世界立立亂，市民心慌慌。近年恐怖襲擊好似瘟疫咁不斷擴散，尤其係內地，疆獨勢力無處不在，暴力事件無日無之，令人不寒而慄。香港雖然冇咁恐怖，但亦唔係幾太平嘅咋。呢，日前啟晴邨啱啱發生警員開槍案，尋日又傳出有恐怖分子計劃喺香港放炸彈，唔係講笑。
係咁嘅，台灣當局聲稱收到情報，一名內地女子會喺呢兩日攜帶炸彈搭飛機嚟香港，已經通報香港同內地相關單位喎。本港多間航空公司亦證實收到消息，話會同當局緊密合作，並提醒前線同事保持高度警覺咁話。
有人計劃嚟香港發動恐襲，後果可以好嚴重，當局究竟有乜嘢對策呢？警方聲稱會同各地情報機關保持緊密聯繫，交換最新情報同評估形勢，密切監察恐怖活動趨勢。
冇錯，恐襲威脅係真係假仲未知，但係人命關天，梗係寧可信其有喇，保安措施寧緊勿鬆吖。正所謂小心駛得萬年船，即使最終證實係虛驚一場，加強安全措施點都唔會錯嘅。
可能有人會話，香港一向係福地，斷估唔會成為恐襲目標啩。嗱，呢鋪講法要戒啦，兵不厭詐，正如武俠小說所講，最好嘅朋友就係最大嘅敵人，最安全嘅地方就係最危險嘅地方，恐怖分子又點會同你客氣吖。有辦你睇，疆獨分子恐襲目標早就唔再局限喺新疆，而係遍及全國各地，北京、昆明等地已先後中招，特別係昆明，距離新疆遙遠，又唔係維人聚居之地，事前根本冇人估到會成為恐襲目標，正因為咁，當局疏於防範，畀恐怖分子有機可乘，結果導致傷亡慘重。
再講吖，恐怖分子製造事端，無非都係想引人關注啫，香港係國際城市，發生恐怖襲擊，肯定成為全球焦點，正中恐怖分子下懷。所以話，如果有人以為香港係世外桃源，可以獨善其身，實在太傻太天真嘞。
話時話，撇開恐襲傳言係真定係假，本港機場保安甩漏多多，早就應該改善啦。本報日前踢爆，機場離境大堂安檢通道如無掩雞籠，保安人員坐視背囊客通過金屬探測器直闖禁區；空郵中心安檢人員唔係當值時玩手機就係瞌眼瞓，萬一有郵包炸彈，後果不堪設想；最離譜係之前試過有人大模廝樣走入捷運系統管道，如入無人之境，搞到系統癱瘓幾粒鐘。恐怖分子取易不取難，本港機場保安似有若無，簡直係開門揖「恐」，唔驚就假。
都係古人講得啱，思則有備，有備無患。唔該港產官僚唔好兩頭望，速速加強安全措施，堵塞保安漏洞，唔好等到爆大鑊至嚟補救吖！