周星馳電影有句經典對白：「地球是很危險的，快點回去火星吧」。其實，現實中嘅香港真係幾危險，啟晴邨槍擊案已經搞到人心惶惶，點知又傳出恐怖分子計劃喺香港放炸彈喎，一波未平一波起，鑊鑊新鮮鑊鑊甘，唔驚就假。
嗱，日前台灣情報機關收到風，指一名內地女子可能喺近日攜帶炸彈搭飛機嚟香港，疑似發動恐怖襲擊，已經通報香港同內地相關單位喎。本港多間航空公司亦證實收到消息，話會同當局緊密合作，並提醒前線同事保持高度警覺咁話。姑勿論情報可唔可靠，為咗安全起見，寧可信其有，不可信其冇吖。
即係咁，香港雖然係福地，好少發生恐怖襲擊，之但係家陣世界立立亂，就算你唔招惹人，一樣會出事。好似疆獨分子咁吖，已經唔再局限喺新疆搞事，昆明、北京甚至廣州已先後中招，搞到死傷枕藉。如果香港唔加強保安措施，好易被人有機可乘嘅咋。
唔係危言聳聽，香港話就話係全球最安全城市之一，其實金玉其外，敗絮其中。呢，香港國際機場作為本港對外嘅第一道門戶，安檢理應密不透風，尤其係美國九一一恐襲後，大家意識到機場保安「沒有最嚴，只有更嚴」，必須做到滴水不漏，先可以防患於未然；加上最近馬航客機失蹤，引發劫機疑雲，機場保安更加不容有失。
可惜香港國際機場啱啱相反，直情好似無掩雞籠咁。本報日前揭發，機場離境大堂保安鬆懈，背囊客竟可通過金屬探測器直闖禁區，保安人員視而不見，見而不理；空郵中心安檢人員當值時亦係神不守舍，有人玩手機，有人瞌眼瞓，萬一有郵包炸彈，你話有乜後果吖？最離奇嘅係，有人大模廝樣走入捷運系統管道，竟如入無人之境，搞到系統癱瘓數小時。難為香港機場仲被評為全球最佳機場之一，原來名不副實。
正如「東方報業民意調查」顯示，機場保安頻頻失守，淪為無掩雞籠，四成二受訪者擔心隨時釀成恐襲及劫機；兩成八批評當局無將馬航事件引以為鑑；兩成五直指第一道防線隨時失守。冇錯嘞，香港作為國際航空樞紐，又係全球知名嘅金融中心，恐怖分子揀喺香港落手，真係一啲都唔奇。難怪四成受訪者批評機管局管理不善，應加強監管及糾正；兩成九直斥管理層責無旁貸；兩成八認為機管局應調查保安失守事件。
古人話齋，弗備難，難必至。最安全嘅地方，往往就係最危險嘅地方，如果當局繼續懶懶閒，任由機場保安中門大開，萬一爆大鑊咯喎，呢隻鑊睇吓邊個孭得起！