醜婦終須見家翁，繼高鐵、沙中線及西港島線工程延誤後，港鐵尋日正式承認南港島線及觀塘延線亦面臨同一命運，須延遲半年完工，明年通車嘅願望正式落空。五條新支線齊齊延誤，港鐵管理層居然可以若無其事咁，究竟知唔知個醜字點寫o架！
唉，佢哋梗係唔知醜字點寫喇，如果仲有羞恥之心，就唔會次次工程延誤，次次都搵藉口卸責喇。嗱，行政總裁韋達誠話喎，南港島線金鐘站需要進行臨時支撐工程，而觀塘延線黃埔站就要處理大量地下管線，所以搞到雙雙延誤，佢仲惺惺作態話感到遺憾，並向公眾致歉喎。
正所謂，錯就要認，打就要企定。鐵路工程嚴重延誤，導致成本超支，拖慢社會發展，道歉係基本動作，問題係港鐵工程問題多多，次次延誤，次次超支，咁樣嘅道歉有乜意義呢？針唔拮到肉唔知痛，港鐵就講得輕鬆咯，一句延遲通車，就當乜事都冇發生過，但事實係工程延誤必定導致成本超支，條數由邊個埋單呢？留低嘅爛攤子又由邊個執拾呢？港鐵工程延誤變成家常便飯，呢度超支百幾億，嗰度又超支幾十億，港府識印銀紙都唔掂喇。
所以講到遺憾咯喎，應該係納稅人最遺憾至啱，點解香港會有間咁無能嘅鐵路公司！
話時話，港鐵對工程延誤懶懶閒，擺出一副關人個關嘅姿態，功夫茶一啲都唔覺得奇怪，鬼叫呢隻鐵路怪獸無王管咩。係人都知，港鐵唔止係一個鐵路營運者，更加係一間影響幾百萬市民日常生活嘅公共事業機構，港府作為監管者，仲係港鐵大股東添，居然長期放任不管，港鐵管理層仲唔有恃無恐咩。呢，南港島線及觀塘延線延遲通車，當局唔止無履行監管責任，加以問責，反而幫港鐵講說話，話具規模嘅基建工程施工難免會出現偏差喎，簡直九唔搭八，不知羞恥。
歸根究柢，港鐵管治烏煙瘴氣，工程醜聞沒完沒了，正正就係港府監管失職嘅必然結果。打個比喻吖，香港回歸十七年，中央政府放任自流十七年，結果咪搞到今日局面失控，尾大不掉囉，家陣至拋出一份白皮書，發出遲來嘅警告，有鬼用咩。
一句講晒，新線五大皆空，港鐵淪為黑洞。唔該港產官僚快快做好自己份工，唔好任由港鐵爛落去嘞，如果唔係，你哋都走唔甩。至於韋達誠咯喎，如果真係覺得對唔住市民，咪馬上辭職落台囉，咁樣大家就信你係真誠致歉嘞！