子在川上曰，逝者如斯乎，不捨晝夜。一三已去，一四已來，由二○一三年過渡到二○一四年，寓意一三一四，亦即一生一世，功夫茶祝各位新年快樂，良朋知己愛人情侶父母手足一生一世！
新年快樂當然係最應景嘅祝福啦，之不過人生不如意事十常八九，現實世界往往有好多事情令人唔係咁快樂，特別係涉及金錢嘅時候，少不免出現「講錢傷感情」嘅情況。傷感情嘅例子之一係香港電台新大樓嚴重超支，傷感情嘅例子之二係口岸工程又係嚴重超支，傷感情嘅例子之三係特區政府嘅財金官僚硬係孤寒成性，點都唔肯大手筆紓解民困！
喂喂喂，本地庫房無疑係大把錢，不過一次又一次超支，會唔會坐食山崩o架？香港電台將軍澳新大樓造價由最初估計嘅約十六億元，暴升三倍至最新公布嘅超過六十億元，早就引起社會嘩然，點不知蓮塘/香園圍口岸工程又話嚴重超支八十五億元。
蓮塘/香園圍口岸係香港同深圳嘅第七個跨境口岸，舊年七月獲批一百六十二億五千三百幾萬元，用作工地平整以及基礎建設工程。事隔不足一年半喎，工程費預算竟然大幅上升至二百四十八億三千二百幾萬元，升幅接近五成三。
發展局發言人解釋喎，工程費用急增嘅主要原因係，鑽孔樁機等等重型機械價格大升三至四成，過去一年工人薪金亦急增最多四成六，加上機電工程價格上升五成四，導致高架道路、隧道以及機電工程預算必須追加三十九億元，佔整體追加撥款四成六。局方又承認，去年申請撥款嘅時候勘探延誤，其後先至發現隧道岩土斷層較預期多，混合地層範圍比原本估算多出一倍有餘，鞏固工程減慢進度又增加鑽挖機損耗，費用增加近七億元。
口岸工程超支八十五億元係咪因為評估失誤呢？咁樣算唔算浪費公帑呢？官老爺梗係矢口否認啦，地球上冇人會願意承認自己係敗家仔，不過事實擺在眼前，納稅人又要為呢一筆龐大嘅額外開支埋單。
講番港台超支吖，立法會不論建制派抑或民主派，齊聲質疑六十億元造價是否過高。有議員以國際建築指標為例，指出同樣面積嘅香港最高級檔次辦公大樓只需十六億至二十一億元，點都冇可能去到六十億元。
逝者如斯乎，不捨晝夜，孔子嘅意思係時間如流水，一去不復返。其實計功夫茶話齋，公帑同樣如流水，逝者同樣如斯乎。有冇可能防止納稅人嘅血汗錢一去不復返呢？有有有，新年新願望，大腳踢走敗家官僚！