功夫茶日日都飲咖啡，當然知道咖啡裏面有咖啡因啦。不過有一家嘢真係唔知，原來咖啡因可以溝毒品，溝完吸毒High到爆，最嚴重嘅可怕後果話唔定係猝死街頭！
聖誕佳節並賀新禧，港男港女少不免狂歡作樂，熱門蒲點之一當然係以爛鬼馳名嘅蘭桂坊。老蘭蒲精最近潮興「啪咖啡因」，溝咗伏特加之後好快上腦，喪玩之士愈夜愈精神。除此之外，其他夜場亦流行利用咖啡因濃度高嘅能量飲品，調出多款深受年輕人歡迎嘅雞尾酒。
當然啦，蘭桂坊作為九反之地係無毒不歡㗎，蒲精唔會溝酒咁簡單，若然咖啡因混合毒品，High到爆嘅代價甚至可能係暴斃。精神科專科醫生丁錫全係咁講嘅，咖啡因係刺激中樞神經嘅興奮劑，毒品會影響神經系統同心臟，假如兩者混合服食，即使分量好少，都有可能引致抽搐以及血壓上升，猝死係最嚴重嘅後果。丁醫生又話，酒精係鎮靜劑，混合咖啡因會令人醉意減少，不經意愈飲愈多。
咖啡因原來係通街有得賣㗎，坊間有唔少健身用品店出售樽裝咖啡因丸，聲稱呢一種「保健食品」可以增強體力，食完跑馬拉松都得，而且售價便宜，每樽八十元至二百元不等，平均每粒幾蚊雞，咖啡因含量每粒大約一百至二百毫克。
講咗咁耐，大家係咪覺得咖啡因其實有相當大嘅危險性？既然不排除有人溝酒溝毒品，官老爺係咪應該好好監管？非常之咁不幸，原來香港嘅法例落後過內地㗎，被稱為港燦真係咎由自取。
內地將咖啡因列作「第一類精神藥品」，根據法例，非法走私、販賣運輸以及製造咖啡因都會被追究刑事責任，持有數量較大嘅咖啡因屬於非法持有毒品罪，可判處無期徒刑。今年十月就有一名香港人，喺深圳羅湖口岸由於攜帶十六點三公斤咖啡因而被捕。
好嘞，功夫茶想問一問衞生署以及禁毒專員，家陣咖啡因存在濫用風險，各位老爺奶奶有冇諗過出手「禁毒」呀？香港目前冇法例監管以保健食品為名出售嘅咖啡因，好容易令到不法之徒乘虛而入喎。係人都知沉淪毒海好大劑，所以政府機器嘅宣傳口號教落，不可一，不可再，向毒品說不。既然係咁，唔該相關部門唔好溫溫吞吞發官瘟，必須防微杜漸，諗諗辦法防止咖啡因荼毒百姓。
話時話，若然真係發官瘟，會唔會係由於飲得太多咖啡呀？會唔會係攝取太多咖啡因呀？不如官老爺自己帶頭「戒毒」先啦！