奇觀奇觀，果然係海洋奇觀！海洋公園有一個水族館叫做「海洋奇觀」，前日出現奇觀到極嘅異象，六條鎚頭鯊短短八小時之內陸陸續續猝然暴斃，仲要係死得不明不白，你話係咪離奇嘅景觀？
講真吖，海洋公園特別多呢一類驚嚇度勁爆嘅死亡奇觀。好似今年九月，有一間酒家嘅善心東主以高價購得被列為極度瀕危嘅玳瑁，一心諗住轉贈海洋公園好好照顧啦，點不知三日之後玳瑁猝死，搞到觀眾無不嘖嘖稱奇。
到底係海洋公園風水欠佳定係照顧不周呢？因乜事幹會有咁多動物一落到園方專家手上就小命不保嘅呢？更加轟動嘅死亡事件發生於五年前，當時有五條國家一級保護嘅瀕危魚類中華鱘送到海洋公園，其中一條過咗冇耐就淪為冷血謀殺案嘅死者，原來兇手係俗稱海狼嘅梭子魚，水族館人員唔知點解硬係要將兇殘嗜血嘅海狼同中華鱘一齊混養。唔好以為急急補鑊採取「種族隔離政策」就冇事，另外兩條同樣被譽為國寶級嘅中華鱘好快亦斷氣，死因係飼養方法不當。
塵歸塵，土歸土，魚死不能復生，惟有寄望海洋公園吸取教訓啦。哈，原來今次六條鎚頭鯊猝然暴斃之前，其實已經有八十條藍鰭吞拿魚死清光，園方一直秘而不宣，冇向外界透露呢一個咁鬼哭神號嘅滅族死訊。
講到呢度，功夫茶諗起一個故事，曾經有人以愛護動物為名，將幾十隻貓貓狗狗飼養於空間狹小嘅單位之內，結果搞到一隻二隻小動物癡癡呆呆圍埋一枱，屎屎尿尿臭氣熏天，健康狀況慘不忍睹。於是乎咯喎，法官大人判呢個愛護動物人士虐待動物罪名成立。
對於死亡事件不絕如縷嘅海洋公園，保育團體早就質疑飼養方法有問題。好似今次集體死亡嘅鎚頭鯊咁吖，香港海豚保育學會會長洪家耀認為，鎚頭鯊需要大量自由自在嘅生活空間，海洋公園將佢哋養於水族館，而且同其他生物共處一室係違反天性，情況如同困獸鬥，最終造成悲劇。
計功夫茶話齋，生活空間狹小絕對係一種虐待行為，你睇下劏房居民嘅苦況吖，你睇下籠屋住客嘅慘情吖，佢哋對於鎚頭鯊以及其他動物嘅遭遇肯定感同身受。所以嚴格而言咯喎，海洋公園涉嫌干犯虐待動物罪名，一直以來玩死咁多海洋生物實在罪不可恕。
開講都有話啦，龍游淺水遭蝦戲，虎落平陽被犬欺，生活空間真係唔可以太狹小o架。好心特區政府盡快改善居住環境啦，否則下次暴斃嘅可能唔止鎚頭鯊，仲有一種動物叫做人類！