俗語話，舉頭三尺有神明。其實對於香港人嚟講，呢句說話應該改為「舉頭三尺有招牌」至啱。無論你行到邊度，只要舉頭一望，梗有一個招牌喺頭頂，唔少仲係日久失修，搖搖欲墜添，問你怕未！
唔係功夫茶亂噏o架，日前旺角有個巨型招牌吊吊揈，睇見都牙煙，為咗拆除呢個都市炸彈，成條彌敦道嘅交通足足癱瘓六小時，搞到七國咁亂。最騎呢嘅係，屋宇署人員一早接報到場，但一味袖手旁觀，直至清拆招牌嘅承建商搞唔掂，署方先至肯幫拖，你話呢班官僚係咪抵鬧吖？嗱，「東方報業民意調查」顯示，四成一受訪者直指屋宇署無吸取教訓處理好舊招牌；四成認為舊招牌已成都市炸彈；一成半擔心道路使用者安全成疑。
危險招牌無處不在，隨時搞出人命，呢啲早就唔係新聞嘞。○八年灣仔一間餐廳嘅大招牌突然倒塌，壓死一名女途人；早前荃灣及深水埗亦發生塌招牌事故，一途人受傷，一私家車被壓毀。危險招牌殺人於無形，而當局到依家仲係懶懶閒，唔怪得五成受訪者批評屋宇署取締違例招牌不力；兩成六直指險象環生，人人自危；兩成一斥署方清拆舊招牌束手無策。
唔講唔知，全港違例招牌多達十九萬個，等於十九萬個計時炸彈，屋宇署執法不力當然係罪魁禍首，不過咁，唔少招牌擁有人為咗拖延清拆，不惜採取各種蠱惑招，例如以轉公司等手法拖延，令屋宇署老鼠拉龜。正如民調顯示，四成八受訪者認為當局須檢討制度，申請安裝招牌應預繳清拆費；三成七指執法存在漏洞；一成一指屋宇署被動受制，拖延清拆程序。冇錯嘞，明知有人走法律罅，梗係要盡快堵塞啦，否則有法律等於無法律，屋宇署仲有乜存在價值吖！
講開又講，自從馬頭圍道發生塌樓慘劇後，舊樓安全問題引起廣泛關注，屋宇署話就話推出唔少補鑊措施，但偏偏諗縮數，不斷削減前線合約員工，導致人手不足，清拆及維修令積壓超過五萬張，前線員工忍無可忍，搞到要以罷工表達不滿。正所謂，工欲善其事，必先利其器，屋宇署自顧不暇，又點可能有效執法呢？四成八受訪者斥當局管治無方，令前線工作不勝負荷；兩成八指人手短缺令執法效果大減；兩成一斥令計劃如同虛設。
講到底，危險招牌無處不在，僭建問題積重難返，都係前朝貪曾政府埋下嘅禍根。當年「經濟機遇委員會」以刺激就業為名，批出一千八百萬元畀屋宇署清拆五千個危險招牌，點知貪曾政府胡混度日，呢五千個危險招牌到依家仲未清拆，簡直害人害物。唉，咁搞法，港人遲早要戴頭盔出街都似！