一場電視台發牌風波搞到滿城風雨，同時引發一個疑問，究竟特區政府有冇誠意發展創意產業o架？你知啦，家陣兩間免費電視台基本上毫無創意可言，慣性收視嗰間重重複複三十年如一日，毫無收視嗰間更加唔使多講，新聞報道唔擺烏龍死錯人已經偷笑。
特區政府係就係有一個「創意香港辦公室」，早於○九年六月一日成立。根據官方講法，創意辦係專責推動香港創意產業嘅發展。春去秋來過咗四年嘞，創意辦有乜嘢建樹呢？有乜嘢貢獻呢？有乜嘢成果呢？真係唔好意思，功夫茶乜嘢都睇唔到，唯一比較感到安慰嘅係，香港最近幾年成為荷里活創意產業嘅拍攝場地。
呢嗱嗱嗱，繼怪獸襲地球將香港地標踩到爛蓉蓉之後，另一套荷里活巨片《變形金剛4》又拉大隊到咗香港取景，斷估又會將維多利亞港兩岸炸到飛起，話唔定連禮賓府都唔放過。荷里活電影人確係創意爆棚o架，佢哋最近有幾套大製作將美國白宮當作恐怖分子嘅遊樂場，禮賓府夷為平地又有乜嘢出奇呢？
功夫茶身為一位電影觀眾，十分期待喺戲院見到《變形金剛4》將香港玩到出神入化。之不過問題係，人哋絞盡腦汁喺香港拍攝，居然一次又一次遇到不愉快經歷，你話係幾咁失禮死人吖！
《變形金剛4》上星期喺鰂魚涌取景，半路中途殺出一對曾經有江湖背景嘅搞事兄弟組，居然勒索十萬元陀地費喎。呢一件事已經令到香港臭名遠播啦，點不知類似事件陸續有來。《變形金剛4》製作人員去到土瓜灣道益豐大廈，上天台睇位籌備嘅時候，有四名男子突然出現，以恐嚇語氣向工作人員索取金錢。大批反黑組探員到場採取拘捕行動，其中三人聞風先遁，探員只能夠拘捕一人帶署調查。
除此之外，電影原本打算喺立法會廣場以及添馬公園拍攝重頭戲，偏偏遇上香港電視員工集會，工作進度受阻。禍不單行嘅係，導演Michael Bay幾乎被高空掟下嘅水樽擊傷，攝製隊亦遇上高空擲物，男星史丹利杜茨更被橙皮掟中。
即係咁，功夫茶強烈呼籲特區政府執法人員全力協助導演Michael Bay順利拍攝，雖然香港自己嘅創意產業受到諸多掣肘，你都唔好阻礙人哋發揮創意吖嘛。至於一眾黑道蠱惑仔，好心檢點少少啦，今時今日收陀地已經肉酸，收唔到變咗被捕更加瘀皮。
總而言之，功夫茶寧願睇一套將香港建築物炸爛嘅荷里活電影，唔想香港人自編自導自演拍一套不堪入目嘅《變爛香江》。