年年歲歲花相似，小一統一派位尋日放榜，例牌又係有人歡喜有人愁。派到心儀嘅學校，全家歡天喜地，好似光宗耀祖咁，比中咗六合彩更加高興；派到唔理想嘅學校，全家心情即時跌落谷底，好似有辱門楣咁，愁雲慘霧，惆悵萬分。唉，可憐天下父母心！
今年情況更加不堪，只有六成八參加統一派位嘅小一學生獲派首三志願，創下十二年新低，搞到唔少家長四出叩門，狼狽不堪。尤其係北區，由於跨境學童持續增加，小一學位供不應求，喺僧多粥少之下，唔少本區學童被派到大埔，家長怨聲載道，有人炮轟教育局政策混亂，有人跪地狂哭，有人甚至指摘雙非兒童霸佔學位。而另一邊廂，雙非兒童家長亦質疑教育局厚此薄彼，點解冇將佢哋嘅子女納入「返回機制」。教育局成為箭靶，正式係豬八戒照鏡，裏外不是人。
即係咁，企喺雙非家長角度，佢哋嘅子女持有香港身份證，本來就有權喺香港讀書，話佢哋霸佔學位，似乎唔係好公平；而企喺北區家長角度，子女本來可以原區返學，相安無事，依家搞到要跨區，舟車勞頓，唔嬲就假。正所謂，家家有本難唸的經，北區家長又好，雙非家長又好，各有各嘅難處，各有各嘅苦水。
歸根究柢，當局至係所有亂象嘅始作俑者。前朝貪曾政府中門大開，對雙非孕婦來者不拒，導致雙非兒童不斷增加，過去十幾年累積多達二十萬人，淨係今年就有一千二百幾名跨境學童參加北區小一統一派位，其中唔少就係雙非兒童。你話喇，北區突然多咗咁多兒童爭奪小一學位，有乜法子唔七國咁亂吖。教育局話就話搞咗個所謂返回機制，畀派往大埔嘅北區學童申請返回原區就讀，可惜兩面唔討好，北區家長固然頻頻撲撲，怨聲四起，雙非家長更指摘當局處事不公，歧視佢哋。
講開又講吖，跨境學童年年增加，北區小一學位不足早就唔係新聞，已經係好多年嘅老問題，當局一直闊佬懶理，直至近年問題不斷惡化，先至急急補鑊，一時加班，一時加人，一時返回機制，點知治標唔治本，愈補愈大鑊。嗱，咪話功夫茶唔提醒，隨着雙非兒童陸續進入適學年齡，跨境學童將會進一步增加，即使好似當局估計一半雙非兒童回流本港讀書，北區學校都難以負荷，何況隨時唔只一半回流添。當局再唔盡快諗辦法解決，就算今年勉強過到骨，未來幾年一樣會出事嘅咋。仲有吖，依家逼爆小學啫，過幾年可能輪到中學，當局究竟識唔識未雨綢繆o架！