真係佛都有火！一次係咁，兩次係咁，次次救火變死火，消防處幾時至可以吸取教訓呀？
嗱，最新一單死火事件發生喺大嶼山大澳棚屋，一場三級大火將呢個東方威尼斯燒到烈燄沖天，濃煙滾滾，消防處趕赴現場撲救，點知救火設施天殘地缺，甩甩漏漏，救火喉似玩水槍，水龍頭又穿晒窿，街喉水壓亦有問題，而滅火輪更加因為水淺而寸步難移，救火隊當堂變咗死火隊。
救火救人分秒必爭，消防處咁搞法，蛇都死啦，唔怪得大火燒咗兩個鐘頭至被撲熄，至少十一間棚屋付諸一炬。好彩逾百名居民及時逃命，有驚無險，總算係不幸中之大幸。居民劫後餘生，無名火起，狠批當局漠視大澳消防設施不足，擔心水鄉一旦再變火鄉，隨時釀成更大災難。
消防處真係抵鬧o架，救火演習就話多多無拘啫，死火救災嘅烏龍場面居然一再上演，講起都把幾火啦。其實，大澳棚屋大火已經唔係第一次嘅喇，十三年前曾發生一場四級大火，當時消防處又係踢晒腳，趕到火場至發現消防喉同街道消防泵口徑不符，無法開喉，結果延誤灌救之下，造成逾百間棚屋燒毀，三百多名居民痛失家園。
唉，十三年前係咁，十三年後又係咁，消防官僚幾時至可以學精呢？唔通有人掛住秘撈，連居民嘅生命財產都可以置之不理？祝融無情，人命關天，居民有乜冬瓜豆腐，你哋固然承擔唔起，萬一水鄉棚屋嘅特色建築消失，你哋一樣賠唔起o架，快啲檢討大澳嘅消防設施啦，殘舊就更換，不足就添置，消防安全問題唔拖得。不過咁呀，換還換，買還買，唔好又傻傻更更，搞出買錯設備入錯貨，最後得物無所用嘅大笑話呀！
咁講啦，救火如救人，其實家陣急須搶救嘅，唔止係大澳嘅消防設施，更加係消防處嘅管理。唔係咩？消防救火十萬火急，唔可以有半點差池，但係消防設施甩甩漏漏，烏龍百出，唔修理一下佢哋嘅管理層，市民嘅性命財產點有保障呀？嗱，唔止大澳o架，火災危機幾乎無處不在，早前之嘛，鴨脷洲海怡半島發生四級火，消防員到場至發現大廈消防栓水壓不足，延誤救火時間，好彩無搞出人命咋。你話嘞，消防處無心無肺，一係救火設施不足，一係監管得過且過，一係買錯設備入錯貨，再咁落去，隨時一鑊熟嘅咋！
當然啦，消防處嘅問題多籮籮，要數真係長過大澳嗰列棚屋，好似花園街大火造成死傷枕藉，消防處花咗年幾時間調查，結論居然係起火原因不明，唔怪得畀裁判官鬧「浪費紙張、浪費時間」喇。一句講晒，消防處要痛定思痛，亡羊補牢，如果唔係，要更換嘅就唔止消防設施，仲有班管理層！