消防十萬火急 不容裙拉褲甩

好衰唔衰消防處最近幾年嘅表現備受詬病，唔知幾時會壞車死火，又唔知幾時會器材失靈，明明係十萬火急，偏偏遇上裙拉褲甩。消防處耗資一億七千萬元引入嘅數碼化無線電通訊系統，以及七億一千幾萬元購置嘅第三代調派系統，五月初相繼死機，耗資合共接近九億元嘅器材四日之內三度失靈，總部通訊中心控制組人員迫於無奈退而求其次，打電話逐間消防局通知，逐架救護車溝通，調派人手變成倒瀉籮蟹。

「東方報業民意調查」結果顯示，對於消防處通訊系統連續兩日失靈，五成五受訪者擔心影響救援效率；兩成認為市民生命無保障；一成七覺得事件不尋常，要求檢查系統。

喂，受訪者嘅擔心不無道理，正如消防處救護員會主席陳仕祺話齋，第三代調派系統投入服務八年以來，幾乎每個月都有故障，搞到救護員有時未能夠十二分鐘到達事發現場。救護員若然由於溝通不足而遲到，意味嘅係危急者有機會失去寶貴嘅搶救時間，唔擔心就假啦。

消防處調派系統癱瘓，必須逐個打電話通知相關人等，民意調查顯示五成一受訪者擔心救援服務延誤；兩成二批評系統兒戲不能接受；一成七不滿消防處亂象百出。

除咗通訊系統失去聯絡之外，消防處仲有其他器材失誤o架，一次又一次浪費公帑買錯車。處方斥資七百幾萬購入俗稱「變形金剛」嘅流動指揮車，居然因為超重而唔可以合法行駛喎，花費七千萬購入十七架法國製油壓升降台消防車，竟然又射水無力喎。對於一而再買錯車嘅荒謬現象，四成五受訪者指摘消防處採購同驗收欠專業；三成二認為得物無所用浪費公帑；一成四不滿消防處烏龍百出。

歸根究柢四個字：管理不善。所以咯喎，消防處處長陳楚鑫真係要自我增值o架，必先利其器嘅所有器材之中，包括一個非常重要嘅人體器官，咪就係陳處長個腦囉。試想想，如果消防一哥笨頭笨腦，設備點會唔買錯吖？管理點會唔不善吖？救援點會唔延誤吖？

請記住，十萬火急，不容有失，關鍵係消防處調兵遣將不容裙拉褲甩，否則後果可大可小。萬一由於救援甩拖而死得人多，下次民意調查嘅題目可能係「消防處處長應否引咎辭職」。