官僚自己查自己 海難真相沉大海

嗱，港府姑妄言之，你就姑妄聽之好喇，唔好信到十足吖。話說調查報告批評海事處內部糜爛不堪，由批圖、驗船到執法一條龍監管甩漏，千瘡百孔，港府急急補鑊，聲言追究到底，仲係威係勢空降一名政務官出任海事處高層添，話要整肅呢個一條龍出錯嘅部門喎。大家估吓最後由邊個領導調查？諷刺咯，答案居然係現任海事處副處長童漢明。咁咪即係自己查自己？咁仲成世界嘅？

係人都知，喺今次事件之中，海事處官僚集體犯錯集體失職，等於坐埋同一條船，佢哋會唔會自揭疏忽職守呢？會唔會自爆醜聞呢？功夫茶就冇乜信心嘞。尤其係童漢明以前主管嘅部門正正就係負責驗船、審圖同負責救生衣規例，由佢調查海難，豈不是等於由煲呔曾爵士調查自己嘅貪腐醜聞？仲有冇荒謬啲呀！

海事處自己查自己，即管聽下當局點解畫。運房局局長張炳良話喎，海難事故中如果涉及行政失當，會先由部門進行內部調查，而調查者必定比被調查者高級，而且不涉及被調查事項咁話。

真係荒謬！照咁講法，個個部門犯錯，都可以內部調查自己查自己喇，咁仲成體統嘅。退一步講，就算內部調查都要睇情況，撞船慘劇奪去三十九條人命，激起巨大民憤，海事處高層至今仍死不認錯，目中無人，靠咁嘅人調查海難責任，咪等於與虎謀皮！

咪話功夫茶踢爆吖，港府話就話調查海難，又話追究責任，又話檢討制度，其實整色整水，大鑼大鼓，無非想文過飾非，蒙混過關啫。功夫茶唔係亂噏，以前屢見不鮮啦，政府部門每當闖出大禍，眾怒難犯，都係話要嚴肅處理，結果次次都係高高舉起，輕輕放下，最後不了了之。呢嗱，大家仲記唔記得○六年沙田富山殮房爆出領錯遺體燒錯屍醜聞，當時衞生署又係話調查，又係自己查自己，仲發表報告提出一大籮建議添，結果幾年唔到，又發生劏錯屍事件，害到市民死都唔安樂。你話嘞，港產官僚犯錯永遠唔使負責，咁嘅調查有乜意義呢？

一句講晒，官僚自己查自己，海難真相沉大海。如果調查報告蒙混過關，失職官僚瞞天過海，唔止無法向遇難者家屬交代，更加無法挽回公眾信心，當局繼續文過飾非，姑息庸官，遲早爆發政治災難嘅咋，到時埋怨海事官僚搭沉船就遲咯！