嘩嘩嘩，喪盡天良呀喪盡天良，功德無量呀功德無量，呢個世界愈來愈詭異莫測！
大家可能會問功夫茶，喪盡天良同功德無量明明係兩個截然不同嘅概念，點解混為一談咁矛盾嘅呢？即係咁，國產奸商見利忘義發錢寒，為非作歹固然係喪盡天良，之但係佢哋嘅無恥勾當有機會為中國消除一大隱患，不久嘅將來或者會令到老鼠絕種，鼠患不再來算得上係功德無量。
如果大家仍然一頭霧水唔知功夫茶講乜，咁就要睇睇一單恐怖到極嘅新聞。有消息踢爆，重慶有間幼兒園發生集體中毒事件，毒到一百一十七名兒童五顏六色。原來喎，有不法商人將被毒死嘅老鼠割肉而沽，冒充牛肉向校方出售，導致幼兒園學生一個二個誤服老鼠藥中毒。
喂，老鼠係一種厭惡性動物，奸商「掛牛頭賣鼠肉」已經令人髮指，更加可惡嘅係呢一種人渣居然將毒死嘅老鼠製成黑心食品賣畀幼兒園圖利，隨時害到小朋友七孔流血而死。如果五雷轟頂真係惡有惡報嘅應有懲罰，功夫茶衷心希望雷公集中火力將奸商嘅頭殼頂轟到徹底粉碎！
除咗鼠肉冒充牛肉之外，中國境內嘅商界賤人仲有一招「掛羊頭賣鼠肉」。最高人民法院指出，近年涉及黑心食品嘅案件大增，一○至一二年期間審結食品安全刑事案件一千五百三十三宗，當中最令人驚訝嘅係，江蘇無錫公安機關發現有人利用狐狸、水貂同老鼠肉，添加明膠、胭脂紅以及硝鹽冒充羊肉發售。
食羊肉可能係老鼠肉，食牛肉又可能係老鼠肉，你話嘞，久而久之神州大地嘅老鼠係咪有機會受到滅絕性屠殺吖？如果係咁樣，喪盡天良嘅奸商確係功德無量o架，做盡壞事之餘叫做無心插柳柳成蔭。之不過咁，老鼠絕種嘅代價好大o架，唔知幾多炎黃子孫要接受集體中毒嘅悽慘折磨，一個唔覺意隨時亡國滅種，該煨！
國家領導人苦口婆心一次又一次警告，沒完沒了嘅貪污腐敗必然導致亡黨亡國。呢一套亡國論絕對唔係杞人憂天，事關五花八門嘅黑心食品的而且確有自我毀滅嘅特殊效能，假如貪官繼續包庇奸商，奸商繼續以毒鼠肉之類嘅黑心食品大發不義之財，亡國實在係一條不歸路。
如果功夫茶係國家領導人，所謂反貪防腐唔係吹水唔抹嘴嘅治國謊言，功夫茶必定會以最嚴厲嘅措施將貪官同奸商趕盡殺絕，一於將佢哋當作過街老鼠咁樣，殺殺殺殺殺殺殺！
大家必須記住，老鼠藥再毒都唔及人心毒，姑息養奸等於中華民族慢性自殺o架咋！