食嘢唔做嘢，做嘢打爛嘢。海事處疏懶失職，海上安全漏洞百出，卒之發生海難，成為千夫所指。家陣被迫補鑊，點知安全漏洞補唔到，反而製造更多安全陷阱添，問你服未。
件事係咁嘅，南丫島海難報告踢爆南丫四號座椅容易鬆脫，係造成多人罹難嘅元兇之一，海事處於是急急補鑊，上月底要求船公司固定船艙內所有活動膠椅。嗱，錯就要認，鑊就要補，既然海上安全存在漏洞，梗係要拿拿臨補救啦，問題係港產官僚無心無肺，連補鑊都補到甩甩漏漏。點樣甩漏呢？膠椅一來固定得太過密密麻麻，二來同長枱之間距離太窄，三來膠椅之間又背對背零距離，一旦發生事故，坐中間位置嘅乘客動彈不得，逃生困難，咁即係靠害啫！
真係唔知好嬲定好笑，明明係補鑊措施，明明要堵塞漏洞，最後反而變咗自製危機，搞到乘客坐立難安。點解會咁荒謬？渡輪公司係咁講嘅，海事處規定喺一個星期內將所有活動膠椅固定喺地板，否則就移走五艘船共一千個座位嘅全部膠椅，但由於時間倉卒，根本安排唔到大型船廠更換座椅，惟有安排工程人員日夜趕工進行加固工程，趕頭趕命之下咪製造出呢幕膠椅陷阱囉。
唉，又係官僚主義之禍。海事官僚個腦係咪硬膠做o架？點解永遠食古不化o架？就算你哋不近人情，逼渡輪公司一星期內交貨，唔該都認真檢驗吓吖。固定膠椅矯枉過正，埋下更多安全隱患，咁搞法，海難慘劇容乜易重演o架！港產官僚返工唔做嘢，做嘢無好嘢，咪話功夫茶踢爆吖，佢哋做事根本唔係為市民着想，而係為方便自己，敷衍塞責、得過且過，總之交咗差就算。你話嘞，成個政府好似無人駕駛一樣，做事求求其其，胡混度日，香港點可能唔七國咁亂吖？
咁講啦，海事官僚就係嗰一張張膠椅，腦袋硬膠得嚟又渾渾噩噩，實在令人坐立難安o架。當然啦，海事處第一把膠椅非處長廖漢波莫屬，疏忽職守間接害死三十九條人命，居然拒絕問責，拒絕落台，甚至連道歉一聲都唔肯講，厚顏無恥成咁，面皮肯定厚過張膠椅呀！
開講有話，船到江心補漏遲，唔通港府呢隻船真係已經爛到無得救？高官咪成日話嘅，會帶住張摺櫈落區聽市民心聲，不如今日就擔定張膠椅聽吓乘客心聲啦，咁就知港府施政出咗乜嘢問題嘞。官僚系統係政府嘅運作機器，如果官僚糜爛不堪，管治班子又點可能有高民望呢？
總而言之，補漏洞矯枉過正，海事處硬過硬膠。港產官僚快啲敦促渡輪公司清除膠椅安全陷阱，如果唔係，隨時又爆大鑊嘅咋！