香港幾怪都有，環保大道唔環保，馬路變垃圾堆填區，問你服未。
話說將軍澳有條環保大道，個名就好聽嘞，好多人一聽到「環保」就諗起清新空氣，鳥語花香，可惜事實啱啱相反，呢條環保大道附近堆滿垃圾，污糟邋遢，臭味撲鼻，簡直不忍卒睹。
點解搞成咁？原來部分垃圾車司機罔顧公德，貪圖方便，將垃圾隨便傾倒喺環保大道一帶，日積月累，情況愈來愈嚴重，環境愈來愈惡劣。現場所見，周圍布滿各種廢物，既有大大細細嘅垃圾膠袋，亦有發泡膠盒、膠樽甚至食物殘渣，莫講話置身其中，隔好遠聞到都令人作嘔喇。尤其每逢大時大節，情況更加嚴重，乜嘢節慶氣氛都破壞晒喇。
其實，環保大道出現隨街棄置垃圾嘅情況已經好耐，居民飽受困擾，港產官僚一於闊佬懶理，關人個關。環保署同食環署舊年至今收到三十宗相關投訴，但就冇積極跟進，導致問題日益惡化。最離譜就係，食環署明知情況惡劣，已近乎失控，仍堅拒裝閉路電視監察，只係靠垃圾車司機自律，等於變相縱容，助紂為虐，你話係咪靠害吖！
冇錯，隨處傾倒垃圾，司機固然難辭其咎，但如果有關部門監管到位，執法得力，通衢大道又何至於淪陷，變成垃圾堆填區吖。裝個閉路電視咁小事都唔肯做，仲點樣旨意港產官僚解決垃圾問題吖，唔怪得堆填區就嚟爆棚喇。
提起堆填區，又係一個爛攤子。本港固體廢物不斷增加，棄置喺堆填區嘅垃圾總量已經增加到每年近五百萬噸，三個堆填區早就不堪負荷，其中將軍澳堆填區兩年之後將告飽和要關閉，如果再唔採用新途徑處理垃圾，香港好快就會變臭港。
弊在政府一直扮鴕鳥，唔積極諗辦法解決問題，一味諗住透過擴大堆填區同延長堆填區關閉時間蒙混過關。呢嗱，當年港府企圖將清水灣郊野公園一部分闢為堆填區，引起全城公憤，最後被迫跪低，點知當局仲未吸取教訓，環境局局長黃錦星早前竟然重彈舊調，話年內會就擴建堆填區展開社會討論喎，簡直九唔搭八。
講到底，本港地少人多，以堆填方式處理垃圾根本行唔通，必須多管齊下，做好源頭減廢及回收，再配合焚化爐，先至有望解決問題。可惜焚化爐興建計劃爭議多多，阻力重重，當局無能為力，只好獨沽一味打堆填區主意，呢啲咪就係縮骨囉。
正如古人話齋，爾俸爾祿，民脂民膏。納稅人畀咁高人工請班官僚，有困難就縮沙，有冇離譜啲吖？家陣垃圾已經堆到上街，「家是香港」變咗「家是堆填區」，究竟仲要拖到幾時吖！