真係冇陰功咯，醫療事故一單接一單，冇耐前瑪麗醫院先至換錯心，家陣輪到瑪嘉烈醫院又搞出人命。功夫茶一心以為食衞局前局長周一嶽離任之後，害人不淺嘅醫療事故會大幅減少啦，點不知事與願違，奪命個案依然停不了。
瑪嘉烈醫院出事嘅情況係咁嘅，有一位五十七歲嘅女病人，患有俗稱肌肉萎縮症嘅晚期運動神經元疾病，必須持續使用呼吸機輔助，否則病情嚴重嘅佢無法自行呼吸。今個月二十六日喎，護士安排病人轉去同房嘅另一個病格，當時負責嘅兩個護士判斷，可以短暫停止呼吸機一兩分鐘，甩機嘅目的係方便運送病人。不過當重新接駁呼吸機之後，病情突然急轉直下，病人跟住心跳停頓。醫生即時施行心肺復甦啦，可惜心跳再次停頓。經過家屬同意，醫生唔再急救，病人喺當日下午四時離世。
香港大學腦內科明德教授張德輝指出，病人如果係百分百依賴呼吸機，唔能夠自行呼吸，甩機一兩分鐘係唔可能嘅事，隨時因為缺氧而令到生命有危險。張教授仲話，當病人必須持續使用呼吸機，不論過床或者接受身體檢查，護士都應該先為病人測試血液含氧量，確定病人能否短暫時間自行呼吸，否則最好「連人帶機」移動病人，或者轉用人手泵氧氣。
暫停呼吸機係咪一個錯誤嘅判斷呢？院方高層雖然鞠躬道歉，又話涉事護士事後勁內疚，所以放假休息，不過始終迴避有冇人犯錯嘅問題，話會成立專家小組徹查喎。
唉，其實計功夫茶話齋，有人犯錯嘅表面證供冇可能唔成立囉。試想想，一個正常人停止呼吸一兩分鐘都好鬼死辛苦啦，何況係一個冇辦法自行呼吸嘅嚴重病人，甩機甩咁耐等於「被斷氣」，後果有幾慘重有眼睇啦，咁就冇咗一條人命。
之前瑪麗醫院換錯心，醫療團隊將去世病人捐出嘅AB型血心臟，錯誤移植畀病情危急嘅五十八歲A型血女病人，造成香港醫療史上第一次換錯器官嘅不良紀錄。院方嘅解釋係話，因為救人心切，所以一時疏忽。
計功夫茶話齋，救人心切可能係事實，不過更加關鍵嘅係救人嘅時候根本唔夠用心。喂，AB型血唔同於A型血，兩者不能混為一談，呢個係小學生都曉嘅常識啦，堂堂醫療界精英有乜可能擺烏龍o架，肯定係換心嘅時候自己冇心裝載，卒之搞出大頭佛。
病人無辜辜被斷氣，換心又戇居居馮京作馬涼，唔該現任食衞局局長高永文醒醒定定，必須責成醫護人員唔可以再出錯。與其事後內疚，不如事前審慎，咁先至係功德無量吖嘛！