水係生命之源，萬物之母，地球唔能夠冇水，人類更加唔能夠缺水，尤其對於依賴東江水嘅香港人嚟講，食水零舍珍貴o架。
唔係講笑，東江水年年加價，香港每年須向廣東繳付近四十億元，明年供水協議到期，又要簽新協議嘞，睇怕水價又會再創新高，你話係咪好珍「貴」吖。正所謂，一分錢一分貨，東江水超貴，水質係咪有保證呢？係咪物有所值呢？
嗱，如果你真係咁諗，你就太傻太天真喇。東方報業為市民把關，分別抽驗東江下游嘅東莞太園泵站、香港船灣淡水湖及藍田公屋自來水樣本，結果發現東江原水樣本嘅重金屬鐵含量超出內地標準六成，該樣本與淡水湖樣本嘅渾濁度均超出世衞組織飲用水標準，其中太園泵站樣本嘅渾濁度超出逾兩倍添。咁都未算吖，本報記者直擊發現，東江下游垃圾漂浮，工程船頻繁穿梭，仲有人游水添，而船灣淡水湖則遍布死龜、死魚，問你怕未。
講起真係冤枉，香港年年使咁多錢，買番嚟嘅竟然係污糟水，直情係搵笨。其實，使錢仲係事小，影響健康事大吖。正如專家話齋，人體吸入過多重金屬，會影響器官功能甚至致癌，而食水渾濁度高，就算經過濾及消毒，亦有機會殘存漏網之菌，隨時病從口入！
唔係危言聳聽o架，當今神州，土壤污染、空氣污染、河流污染，可以講係無所不污，中國人食嘅係有毒食品，飲嘅係渾濁食水，呼吸嘅係烏煙瘴氣，想唔病從口入都幾難喇。呢，早排上海黃浦江漂滿過萬隻死豬，而湖南衡陽等地又見死嬰塞河，已經夠晒恐怖，有傳媒仲爆料指黃河上游嘅蘭州段每年最少發現過百具人屍，而黃河流域歷年撈到嘅人屍估計已超過一萬具，簡直駭人聽聞。
大家試諗吓，喺道德淪亡嘅今時今日，黃浦江漂死豬，黃河漂屍體，東江又好得去邊呢？話時話，東江水質其實一直令人詬病，本報曾多次揭發中上游及深圳水庫環境惡劣，非法排污問題嚴重。就以廣東河源新豐水庫為例，當地有企業私下採礦，含有化學物質嘅污水直接排入水庫，導致大批養魚及田雞離奇死亡；加上沿岸違規開設嘅旅店及食肆胡亂排放糞水及廚餘，水質更加渾濁不堪。而作為供港東江水配水庫嘅深圳水庫，舊年亦被揭發河涌遍布糞便、死老鼠同埋用過嘅安全套等垃圾，真係睇見都想嘔。
即係咁，東江水年年加價，香港人就算不滿亦無可奈何，但盜亦有道，內地當局除咗識得加價，亦要識得改善水質至得o架。至於港產官僚亦要醒少少，除咗嚴謹把關，亦應該要求內地加強監管，唔好得過且過，搵七百萬港人嘅健康開玩笑吖！