中環出更：拒談再選 劉慧卿質疑區諾軒反口
立法會議員區諾軒早前以「Plan B」身份，代替被取消參選資格嘅香港眾志常委周庭參加立法會港島區補選。尋日佢出席前立法會議員劉慧卿（卿姐）網台節目時，就被問到會否參加二○二○年立法會換屆選舉。區諾軒就笑住話︰「Never say never （永不說不）」隨即被卿姐質疑，話佢曾經講過唔會參選，但依家就話「Never say never」，疑似反口。
區冇表明下屆出選意願
區諾軒話，佢可以同眾志合作，依家眾志多名成員都喺佢辦事處做嘢，但「區諾軒就係區諾軒，香港眾志就係香港眾志」。卿姐就質疑，如果眾志唔再同區諾軒合作，到時又點。區諾軒就話，如屆時政府可以畀眾志出選、而眾志又有合適人選嘅話，佢就會十分樂意同高興畀嗰個人參選。至於佢自己下屆會否出選，佢就只係話依家離下屆比較遠，冇表明下屆究竟仲選唔選。
去年退出民主黨（白鴿黨）嘅區諾軒又話，雖然退咗黨，但唔會同前黨友形同陌路人，而白鴿黨立法會議員胡志偉亦多次喺議會工作上提點佢。
卓妮