嘩嘩嘩！勁勁勁！全國三十四個省市之中，以競爭力而言，台灣排名第一，真係了不起！所以話啫，寶島即係寶島，台灣嘅表現絕對值得世人對佢如珠如寶。
幸福指標高人一等嘅廣東都唔弱喎，競爭力全國排第二，「幸福廣東」果然不同凡響！
咦，唔對路唔對路，乜香港唔係中國其中一個省市咩？如果奉行三不政策「不統不獨不武」嘅台灣都算係，早已回歸祖國懷抱嘅香港冇理由唔係。等功夫茶睇真啲先……唔係眼花吓話？社科院發表最新一份省域競爭力藍皮書，台灣排名第一，廣東排名第二，香港排名第三，江蘇排名第四，浙江排名第五。研究發現香港喺持續發展方面排名上升，但宏觀經濟同產業經濟就排名下降，所以整體排名由○六年排第二變成一○年排第三，廣東後來居上超越香港。
呢鋪真係大大大劑！功夫茶相信大部分國人同胞包括本地土著都有一個錯覺，以為號稱識得生金蛋又傳聞通街有金執嘅香港，競爭力一定係全國最高。點不知社科院揭發一個「絕望真相」，香港莫講話家陣嘅競爭力唔係第一，其實早於○六年已經淪為老二。唉，晴天霹靂呀晴天霹靂，香港被邊緣化嘅噩夢原來並非杞人憂天！
社科院研究人員係咁講嘅，香港總體實力好強，但由於近年內地省市增加投資，工業增長迅速，ＧＤＰ同財政收入增長都比香港快。研究人員又話，中國東部沿海省份嘅海運發展正追趕香港，香港有好多內地城市無法比較嘅優勢，譬如國際貿易同金融中心，但香港應該更多發展實體經濟。
簡單咁講，龜兔賽跑，香港係一隻跑下跑下會瞌眼瞓嘅大懶兔，唔經唔覺被一步一腳印嘅烏龜超越，而且唔係一隻烏龜，係兩隻咁多呀，該煨！
見到呢一個排名，功夫茶真係欲哭無淚。講來講去都係曾蔭權政府實在太無能，上任七年搞到一鑊粥。一事無成都算嘞，呢一個煲呔仲要官商勾結，正經事唔識做，玩盡富豪遊艇同私人飛機就叻到冇人有，靠佢發展實體經濟喎，機會渺茫過一票獨得六合彩頭獎。
唐英年作為冇耐之前嘅特區二哥，亦都係醜態百出。唐唐為官九年毫無政績可言，只有三件事街知巷聞，第一係感情缺失，第二係非法僭建，第三係賣妻求榮。政府第一把手同過氣第二把手都係不入流貨色，香港競爭力想唔輸都難啦！
香港競爭力輸了，噩夢邊緣化來了，有冇辦法起死回生呢？求神拜佛，下屆特首千祈唔好累到香港英年早逝！