港府好大喜功，死要面子，不理民生多艱苦，擬豪擲四百多億元申辦二○二三年亞運，連日來被網民狠批到日月無光，話佢哋搞唔掂民生，應該要腳踏實地，好似利用申辦亞運的使費購回東、西隧，解決塞車問題更實際。
曾德成局長上電台大發謬論，說甚麼「市民將亞運視作投資，不應當成『洪水猛獸』」。唉！將「亞運視作投資」？你估真係「德成介紹，融入家中」咩？歷來申辦乜運物運都冇乜運行，唯獨經德成在空氣中一呼，大氣電波就可「凝聚力量」乎？老朽信網民多啲：申辦亞運即係「倒錢落海」，衰過去馬會博一博，單車邊有機會變摩托。投資亞運，唔變大白象都有排你呻。
曾局長高官厚祿，自然可以不食人間煙火，話有啲嘢唔係錢可以衡量。老朽心諗，要是我的女人也有這般見識與胸襟，老朽必定「凝聚力量」，老而不死都唔會仰天悲嘆「是為賊」。德成說話，女人要聽！
有則寓言：一位年邁的北美切羅基人教導孩子們人生真諦。佢話：「在我內心深處，一直在進行着一場鏖戰。交戰是在兩隻狼之間展開的。一隻狼是惡的，牠代表恐懼、悲傷、悔恨、貪婪、謊言、自私；另一隻狼是善良的，牠代表喜悅、和平、寬容、希望、真理、慷慨、忠貞。同樣的交戰也發生在你們的內心深處，在所有人內心深處。」聽完老者的話，孩子靜默不語，若有所思。過了片刻，其中一孩問：「究竟哪一隻狼獲勝呢？」飽經世事的老者回答：「你餵給牠食物的那隻。」
要凝聚力量，就要給我食物，而不是教我勤運動！