政情：醫局設宴送別蘇利民
醫管局行政總裁蘇利民前日正式掛靴，尋日起程返澳洲照顧家人。前晚醫管局主席胡定旭同班一齊拆過彈嘅醫管局高層及醫生好友，喺中國會羅漢請觀音，為歸故里嘅蘇利民餞行。
梁栢賢未敢談接班
盛傳為下屆CEO熱門人選嘅梁栢賢最早「上科場」，七點四十分就到達中國會。梁醫生話同蘇利民一齊經歷過豬流感同三聚氰胺奶粉事件，彼此合作無間。唔知蘇利民臨走前有無交低手頭上啲嘢畀梁生呢？笑笑口嘅梁醫生即時耍手話︰「未知邊個做（接任），唔好講呢啲嘢！」果然好有警覺性。
肥胡前晚帶埋佢支白酒「舍得」去贈興。衞生防護中心總監曾浩輝都帶住袋神秘禮物嚟，佢唔肯講係乜嘢，但就大讚蘇利民好好人，講咗好多澳洲趣聞逸事畀佢聽，兼且介紹好多澳洲靚酒畀佢。食物及衞生局常秘（衞生）李淑儀就話同蘇利民係一個團隊，大家好好傾兼有默契。
至於主角就壓軸登場，蘇利民同太太八點幾到場，初嚟港時患咗香港傳媒恐懼症嘅佢，依家已經無病無痛，佢仲話好唔捨得香港，所以一定會返嚟咁話。
