政情：EQ南極冰潛之旅驚遇15米巨浪
強調為首位女性勇闖南極冰潛嘅香港節能關注聯盟創辦人葛珮帆（EQ），上周六返抵香港。EQ此行破咗多個紀錄，包括首次五日五夜喺海上顛簸冇得瞓，首次近距離目睹企鵝BB出世，最激係遇上智利大地震餘波未了，EQ坐嘅船遇上十五米滔天巨浪，險象環生。
智利大地震餘波
民建聯新星EQ尋日憶述話，首次潛到攝氏零下二度冰水，嘴唇、手指同大腦凍到麻痹，佢仲做埋深海冰潛攝影師，托住大機下潛，點知畀強大水流扯到人仰馬翻，好彩喺冰天雪地下曬太陽嘅企鵝、海獅乖巧好多，任影唔嬲，全程佢影咗八千幾張相，遲啲仲會出書。
此行有五十七名十八個國家嘅科學家及專家同行，香港人有三位，除咗EQ及老公，仲有城市電訊主席王維基。王維基臨行前寫定遺囑，EQ懶得寫，惟獨知道智利發生大地震後，貴一貴都用衞星電話向家人報平安。
點知話口未完，地震激起嘅風浪連南極都感應到，海面捲起十五米巨浪，隊員置身船艙如坐過山車，結果有人跣倒扭親腳、仆崩下巴，亦有人夾斷手指，EQ天生異稟，無暈浪亦無嘔，但折騰咗廿五日，都瘦咗六磅。
去親南極，動輒要十幾萬，仲未計冰潛，但EQ就話錢字無謂講喎。