激鬥贏湖人魔術報番仇

為報上季總決賽一敗之仇，魔術昨日主場鬥湖人打得特別硬淨，其中班尼斯同高比拜仁多次鬥批㬹，在第3節胸頂胸後各攞一個技術犯規，隨後班尼斯竟然喺入樽後，有意無意將腳掛喺高比身上，雙方再次出現對峙，魔術中鋒杜域侯活為幫隊友，更同高比鬥鬧，無端端又食技術犯規。

好彩杜域侯活成功將功補過，全場有15分同16個籃板球，加上卡特亦有25分，最終令克服腸胃不適、攞到34分7個籃板球同7次助攻嘅高比都要輸波，同時令湖人自08年2月由灰熊簽入加素後，首次錄得3連敗。賽後杜域侯活喺更衣室扮狗叫，反擊湖人喺比賽中寸魔術係小狗。

金塊贏波餞別卡爾

湖人雖然輸波，但「壞孩子」阿堤斯非常搶鏡，佢將頭染成代表湖人嘅金色，然後用紫色染上意思都係「防衞」嘅中文、希伯來文同印度文字，目的係向前公牛球星洛文致敬。

另外，早前承認患上喉癌嘅金塊教練卡爾，昨在做手術前最後一次領軍出擊，成班球員亦表現得相當生性，喺主將安東尼及比立斯合共轟入51分下，金塊最後喺主場以118比106擊敗拓荒者，以贏波餞別卡爾！

■本報綜合報道