政情：肥亨同情80後無殼蝸牛

肥亨慨嘆，佢喺一九七三年打第一份工月賺一千六百元，當時市區樓價只係二百元一呎，換言之佢一個月嘅人工可以買到八呎市區單位。不過依家連元朗一手樓都賣到五、六千元一呎，年輕人即使好彩月入一萬六千元，一個月都只不過買到兩三呎，如果想買市區樓，成個月糧可能連幾吋地磚都買唔到。

話靠政府不如靠己

肥亨分析，八十後嘅困局在於社會向上流動性低，加上全球一體化下年輕人嘅競爭大咗，要向上爬絕非易事，生活壓力自然大大增加。佢認為，政府一定要諗計幫吓年輕人，不過佢呼籲八十後，與其靠政府不如靠自己更實際，首要係提高競爭力，一有機會要去外國、返內地闖一闖，力求「升呢」搵出路。

佢仲以自己作例子勉勵青年人唔好介意喺「隔涉」嘅地方置業，佢話三十幾年前首次喺加拿大置業，由於做嘢六年儲蓄五萬港元啱啱夠畀首期，喺當地一個「山旮旯」地方買樓，結果畀同事嘲笑，但佢覺得上到車已經好好喇。

講開偏遠地區「上車盤」，肥亨前日陪一個朋友去將軍澳睇樓，佢認為將軍澳同元朗都唔就腳，不過如果喺香港島返工，住喺將軍澳就會較方便，而且車費少啲，計落賺咗唔少時間同金錢，肥亨仲話，將軍澳有啲二手樓高層單位，呎價都係四千幾元，比部分元朗一手樓便宜。