內地近年打虎拍蠅，動作不斷，用領導人嘅話，就係反腐永遠在路上。其實唔單止「反腐」，「打蛇」一樣係永遠在路上，千祈唔可以畀佢停。事關道高一尺，魔高一丈，人蛇集團手法變化多端，執法部門瞌陣眼瞓都唔得掂吖！
呢嗱，話口未完又嚟嘞！警方尋日聯同廣東省公安邊防總隊採取聯合行動，打擊一個由內地偷運越南人蛇來港嘅偷渡集團，經過一輪海陸空大規模搜索，喺港島鶴咀最南部嘅石灘附近拘捕多名搶灘人蛇，之後再喺旺角拘捕兩名疑似蛇頭，據聞部分人蛇已經落山並搭車出到筲箕灣市區，有冇漏網之魚，真係冇人話得埋。係人都知，以往人蛇搶灘熱點主要集中喺大嶼山以及西貢一帶，家陣居然發展到喺市區附近登陸，認真得人驚。
正所謂，蛇有蛇路，鼠有鼠路，人蛇集團周不時都會轉移偷渡路線同埋模式，偷渡起點近年嚟已經由香港周邊嘅深圳、珠海等地，逐漸後退到廣州、東莞、中山等環珠三角城市；又好似港府近年大幅提高蛇頭罰則，部分偷渡集團見招拆招，改由人蛇自己揸快艇，一入到香港境內即時舉手聲請免遣返，蛇頭就留喺香港以外水域遙控指揮。之所以話「打蛇永遠在路上」，就係咁解。
當然喇，殺頭生意有人做，蝕本生意冇人做，安排人蛇來港儼然成為龐大產業鏈，以南亞假難民為例，每人盛惠二萬幾港元，呢個數，足足係印度、巴基斯坦人嘅年均收入兩倍有多；偷渡來港花錢多唔在講，仲分分鐘葬身怒海餵鯊魚，如果唔係香港地真係遍地黃金，邊個肯搵命博吖？
其實條數一啲都唔難計，假難民喺香港瓣數多多，打份搬運工月薪閒閒哋都過一皮，兩、三個月回本，做多一年半載直頭衣錦還鄉。咁就難怪當局點樣嚴打偷渡人蛇都好，假難民黑工始終都係禁之不絕，淨係過去三年已經大幅飆升四成，都咪話唔誇張。打黑工仲係其次，最攞命係部分假難民充當本地黑幫爛頭蟀，開片、睇場、販毒樣樣齊，香港就係咁樣畀班友搞到雞毛鴨血，永無寧日。
冇錯，喺本報多年來堅持發揮第四權監察天職下，當局開始正視假難民問題，亦取得一定成績，可惜始終停留喺加快處理免聲請積壓個案嘅層面，一講到退出國際難民公約就耍手擰頭。其實即使唔退出公約，亦唔代表要對假難民來者不拒，澳洲政府將難民囚禁喺孤島上，就係最佳例子。
一句講晒，對假難民仁慈即係對市民殘暴，連地大物博，資源豐富嘅歐、美、澳都對難民嚴防死守，香港憑咩效婦人之仁啊？