香港醫學界話就話達到國際一流水準，事實可能連三流都不如嘅咋，唔講前線醫護長期鬧人手荒，亦唔提全城鬧爆嘅醫生丟低換肝病人三粒鐘，淨係講儲存疫苗呢啲咁簡單嘅事，一樣有本事搞到亂七八糟，一塌糊塗，簡直靠害。
嗱，港府年年大力宣傳叫市民接種疫苗預防疾病，但唔知大家有冇諗過，萬一存放疫苗嘅設備唔合標準，輕則針劑無效，重則隨時害人呢？唔係講笑，全港估計有高達九成私家診所冇採用專業嘅藥用雪櫃儲存疫苗，只係用普通家用雪櫃應付了事，雪櫃溫度係咪穩定固然冇人保證，萬一有人順手將飯盒、飲品都放埋入去，令針劑受到污染先至最大鑊。喂，就算係小朋友用嘅奶樽，都要用專門嘅蒸氣鍋消毒，唔可以同其他煮食鍋混用，就係避免奶樽受污染，冇理由儲存疫苗可以咁求其啩。
因乜解究私家診所儲存疫苗搞到同第三世界冇乜分別？答案一字咁淺，咪就係衞生署冇監冇管囉。即係咁，疫苗必須儲存喺攝氏二至八度嘅環境，但衞生署冇規定診所必須使用藥用雪櫃，只係建議啫，既然冇法律約束力咯喎，診所為咗節省成本，梗係話之你喇。仲有喎，《診療所條例》只係規定醫生要妥善儲存藥物，但衞生署就無權巡查，一切講個信字，咪即係冇牙老虎囉。前朝嘅食衞局局長高永文係就係講過會加強監管，可惜噏完就算，家陣人走茶涼，更加冇人關心喇。
不過諗落都唔出奇嘅，事關衞生署自己都其身不正。今年三月之嘛，機電署例行檢查時揭發衞生署兩部醫學用雪櫃嘅感溫部件出問題，實際溫度比顯示器溫度低咗幾度，涉及二百多劑季節性流感疫苗，連衞生署都搞成咁，其他私家診所求求其其，是是但但，係咪好正常呀？
再講吖，就算採用咗藥用雪櫃存放疫苗，都唔擔保唔出事。呢，早排先至有數十部供應復康中心及庇護工場使用嘅藥用雪櫃出現結霜、自動開門等問題，搞到疫苗報廢，一班院友到家陣都冇針打，都唔知點收科。所以話啫，咪睇香港乜都有規有矩，實際上無王管就真。你知啦，藥物必須小心處理，否則隨時變毒物，後果可大可小，衞生署一味隻眼開隻眼閉，簡直草菅人命喇。
話時話，疫苗出事並非罕見，去年山東疫苗大案震驚全國，犯罪集團販賣不適當儲存或過期疫苗，不知害死幾多人，涉事者及監管機構最終受到嚴懲。衞生署繼續懶懶閒，唔通真係想香港步內地後塵？到時剖腹謝罪都唔掂吖！