「開門揖盜」大家聽得多，「開門養盜」就真係聞所未聞。呢嗱，假難民蜂擁來港，作奸犯科樣樣齊，港府中門大開，供食供住畀埋錢打官司，照顧無微不至，以為對方會感激你？當你羊牯咁撳咋！
功夫茶唔係空口講白話o架。話說免遣返聲請人士滯港期間，港府出於人道考慮，每個月向佢哋發放為數一千二百元嘅食物券，點知卻淪為不法之徒嘅提款機，有集團向聲請者以低價購入食物券，再高價轉售賺取差價牟利。當局為堵塞漏洞，將食物券改以電子儲值形式發放，卡上附有聲請者嘅樣貌同簽名，可惜道高一尺，魔高一丈，本報記者追查發現，唔少持卡人以八舊水折讓價將食物卡賣畀「刀手」，「刀手」花光餘額後再將卡交還，以便卡主第二個月再到志願機構增值。
咪睇一張卡淨係賺得四舊水，查實小數怕長計，山大斬埋都有柴，於是乎有部分持卡者自己兼職做埋買手，實行肥水不流別人田。佢哋接柯打做嘢，到指定超市用食物卡掃貨，之後直送同鄉經營嘅士多，以八折轉售相關貨品，士多再以正價出售食差價。
不可不知，接受食物援助嘅聲請者逐年增加，今年首七個月已經有一萬三千多人，比去年及前年同期都要多，以每月一千二百元計算，「市場規模」每年近二億元，一啲都唔嘢小！
最離譜嘅係，納稅人擺明畀人搵笨，一樣吹佢哋唔脹。正如法律界人士話齋，如果聲請者只係購買食物後變賣，未必鋤得佢哋入，頂多影響將來難民資格。咪玩啦，十個難民九個半係假，所謂「影響資格」，毫無阻嚇力可言。再講吖，定罪判監又如何，入面待遇良好有人工收，假難民當另類度假嘅咋。
廣告都有賣，「去旅行，去到盡」，對於假難民嚟講，嚟香港梗係「攞着數，攞到盡」，除咗食物券，租津亦係假難民嘅重要生財工具，虛報租屋資料有之，同業主合謀者有之，簡直五花八門，無奇不有，廉署亦曾經破獲過相關案件。
功夫茶講到口水都乾嘞，要杜絕假難民來港誘因，最直截了當莫過於退出國際難民公約，最低限度都要設立禁閉式難民營集中管理，否則長此下去，食窮香港不特止，假難民亦唔見得會感恩戴德。之前有個也門聲請漢接受「爛果報」訪問，話如果真係設禁閉營，寧願跳維港自殺喎。咁就奇嘞，尋求得庇護，照計喺家鄉受盡折磨，保得住命仔已經還得神落，區區「禁閉」有乜大不了吖？
此處不留爺，自有留爺處。假難民既然覺得香港咁「不人道」，唔該速速過主，反正以佢哋嘅「生意頭腦」，去邊度都唔愁搵唔到食喇！