有個笑話係咁嘅︰外國名醫諗住嚟香港搵食，點知參加本港執業考試時，題目居然係從未接觸過嘅「香港腳」問題，唔使問阿貴，自然係鎩羽而回喇！
上述笑話本來係諷刺本港某啲專業界別嘅排外作風，但亦反映一個實際問題︰各地風土、流行病在在不同，絕對唔可以一本通書睇到老。好似今年嘅季節性流感疫苗咁，港府跟隨世衞指引，購入預防「香港型」流感嘅疫苗，世衞之後又話全球流行嘅流感病毒株出現抗原變異，由「香港型」轉為「新加坡型」，令原本嘅疫苗效力成疑。國家疾病預防控制中心主任高福尋日接受記者訪問時就咁講，流感病毒變異性高，即使同樣處於南半球，唔同地方嘅病毒株都會有分別，香港根據實際情況使用疫苗，效果可能更好。
好多人一聽京官「教路」就本能反應耍手擰頭，但平心靜氣諗吓，又的確有啲道理。唔係咩，兩個人患同一個病，中醫會因應寒底、燥底處以唔同藥方；西醫亦係一樣，病人注射麻醉藥，都會因應體重等因素用唔同劑量。
雖然道理一字咁淺，偏偏官僚牛皮燈籠點極唔明。佢哋「跟車太貼」已經唔係第一次，前年世衞預測「德克薩斯型」流感會流行，不料「瑞士型」至係堅嘅，結果咪搞到揦手唔成勢囉。
冇錯，世衞指引係有佢嘅參考價值，但各地情況千差萬別，要做調查研究都冇可能做到咁仔細，最終都係要靠各地政府自行判斷。再講吖，任何組織都係由人組成，只要有人嘅地方就有可能犯錯，世衞當然唔會例外，特別係之前揸旗嘅「雞珍」，喺香港為官嘅表現有口皆悲，連佢自己都不得不承認，主掌世衞期間應對全球伊波拉病毒疫情犯下錯誤，港產官僚唔理三七廿一，將世衞指引奉為聖旨，點可能唔出事吖。
好嘞，咁點解官老爺硬係要「二仔底──死跟」呢？好簡單，第一係「懶」，第二係「卸」。「世衞指引」非常就手，拿來主義就掂，自己唔使再花精神做研究；出咗事亦可以用「跟足指引」做擋箭牌。咪話功夫茶唔提醒，萬一第日真係因為當局入錯疫苗而出現嚴重疫情，主事官員吟詩都吟唔甩，莫講話世衞，玉皇大帝都保你哋唔住吖。
港府最近話要恢復初中中史必修科，其實最應該讀嘅係港產官僚。當年毛伯伯革命成功，就係因為冇將蘇聯搞工運嗰套死搬硬套，識得根據國情搞「農村包圍城市」。港產官僚連「具體問題，具體分析」都唔曉，唔該返番去由BB班讀起喇！