古人話齋︰國家之敗，由官邪也。香港烏煙瘴氣，七國咁亂，講到底都係港府其身不正、官官相護搞成，民航處大花筒醜聞隨時不了了之，咪就係典型例子咯！
呢，本報近年多番踢爆前民航處處長羅崇文主責嘅新總部大樓項目，極盡大花筒之能事，大樓內「大浴場」、「跳舞場」同「電視城」等豪華設備，分分鐘媲美古羅馬王宮，醜聞轟動全城。運輸及房屋局調查結果日前出爐，證實一名相信係羅崇文嘅高級首長級官員「行為不當」，已經按公務員程序採取簡易紀律行動，即係口頭或者書面警告了事；至於另一名同樣喺事件中有不當行為嘅首長級人員，因為已經退休，公務員紀律機制冇佢符，淨係可以將不當行為正式記錄喺人事檔案。
唔係啩，羅崇文醜聞多多，除咗多次被審計署炮轟，更被立法會帳委會以最嚴厲嘅字眼「痛斥」，甚至佢老哥退休，港府連讚揚佢「貢獻」嘅例行公事都慳番，點可以一句「不當行為」就輕描淡寫帶過？仲有吖，「搣長糧」係「紀律行動」，「面斥不雅」又係「紀律行動」，當局對羅崇文高高舉起，輕輕放下，即係包庇啫，佢老哥咁都可以全身而退，除咗一炮過千二萬退休金，仲每月穩袋超過七萬元可以咬過世嘅長糧，仲有天理嘅？
話時話，羅崇文任內臭史厚過本電話簿，絕對唔止大花筒咁簡單，特別係經佢手採購嘅新空管系統，大拿拿十幾億元買着個爛燈盞，表現仲衰過舊系統，早就有立法會議員質疑成單嘢涉及以權謀私同利益輸送，唔排除向廉署舉報。家陣冇嘢怕，最怕廉署一陣又話驚有人「唔合作」耍手擰頭咋。
羅崇文劣迹斑斑都可以安全着陸已經夠離譜，另一名民航高官因退休獲放生，更加係荒天下之大謬。錯就係錯，冇可能退休後當粉筆字抹咗就算，中國古代對付貪官，死咗都要開棺戮屍甚至挫骨揚灰，現代冇咁殘忍，起碼都要接受應有嘅懲罰，前政務司司長許仕仁就係人辦，公務員退休成為免責擋箭牌，點都講唔通！
咁點解呢單臭史不了了之？有人猜測民航處老頂、運房局局長張炳良已經執緊包袱走人，索性賣個順水人情，官官相護「大赦部下」。咁又係呀，張局長管邊瓣衰邊瓣，自己退休後都驚住畀人追殺，咪做人留一線，日後好相見咯。
計功夫茶話齋，一眾特首參選人與其吹噓治港大計吹到天花龍鳳，不如腳踏實地由基本做起，執番正公務員紀律好過喇！