人蛇犯罪停不了 抱薪救火得其反

呢嗱，港府啱啱至喺施政報告裏面公布多管齊下措施，建議入境處加快審核酷刑聲請個案，同時設立專門機構處理相關個案審批，係威係勢咁款，可惜舊嘅瘟神未趕得切，新嘅瘟神又蜂擁而至。警方前日喺尖沙咀進行掃毒行動，喺一名印度籍持行街紙男子屋企搜出大麻精、可卡因等毒品，以及包裝同販毒工具，懷疑有人以體內藏毒方式將毒品運入香港。仲有就係兩名持擔保書嘅孟加拉籍免遣返聲請男子，被控喺五金舖打黑工，尋日被法庭判監十五個月。

事實勝於雄辯。持行街紙非華裔人士干犯刑事罪行嘅數字近年不斷飆升，舊年平均每日就有超過四人被捕，足足比前年增加三成半，其中涉及嚴重毒品罪行嘅亦增加一成。至於打黑工被捕嘅，亦比前年增加超過兩成三。點解假難民禁之不絕？好簡單啫，天下熙熙，皆為利來，人蛇只要成功搶灘，一邊接受港府接濟有得食有得住，另一邊打黑工甚至拍住黑社會碼頭搵真銀，再唔係向港府索要「人道賠償」，亦係唔錯選擇，咁就難怪無論港府點樣加快審批程序，點樣收緊高危地區簽證手續，永遠都追唔上假難民來港速度喇。

功夫茶講到口水乾都要再講一次嘅嘞，要徹底將假難民拒之門外，無非兩招，其一係設立禁閉式難民營嚴加看管，切斷假難民財路之餘，市民亦可免受滋擾，以港府處理越南船民嘅豐富經驗，應該唔難搞。再就係退出國際公約，即使一時三刻做唔到，最起碼亦應該實行即捕即解。有辦你睇，內地同澳門當局都有簽署公約，但人哋嚴厲執法，絕不手軟，假難民想為禍都難。

所以話，解決假難民問題，港府非不能也，實不為也，根本就係買咗班左膠偽善政客怕，驚畀人標籤「種族歧視」。查實喺左膠大本營嘅歐洲，各國政府都陸續收緊難民政策，港府更加冇必要效婦人之仁。再講吖，同樣係非法入境者，點解內地人蛇即時遣返，反而南亞人蛇就有特別優惠，話唔係內鬥內行嘅民族劣根性作怪，三歲細路都唔信。

總之講乜都嘥氣，假難民犯案搞到香港雞毛鴨血，市民已經忍無可忍，本屆政府口口聲聲有決心解決問題，仲多謝本報揭露有關亂象，唔該拿拿臨找埋條數，反正特首冇連任壓力，咪當臨別秋波為市民做番件好事囉。