俗語話，好人難做，好事難為。本報多年來鍥而不捨踢爆假難民禍港真相，點知港府無動於衷唔在講，仲畀嗰班偽善政棍倒打一耙，話有關報道係「抹黑難民議題」、「煽動種族歧視」喎，呢啲咪叫是非顛倒、含血噴人囉！
話口未完又嚟，就尋日之嘛，有持行街紙南亞裔人士喺元朗被捕，仲搜出尼泊爾彎刀等武器；有持行街紙南亞賊喺觀塘小巴搵食，結果被途人合力制服；再有就係醒目看更識破南亞賊人企圖進入地盤爆竊，報警拉人。大家有眼見，同類案件日日爆個不停，相關事件簿仲長過股市行情表，本報報道真相只係有碗話碗，有碟話碟，何「抹黑」、「煽動」之有？
班所謂人權鬥士最叻就係問有咩證據證明南亞兵團禍港，呢，警方數字顯示，舊年全港整體罪案約六萬宗，創近四十年以來新低；反觀同期非華裔人士因刑事罪行被捕嘅有四千幾人，較前年增加百分之五，當中持行街紙嘅達千幾人之多，更較前年激增三成五，干犯罪行包括盜竊、傷人、毆打、販毒等等，簡直無惡不作。
呢嗱，情況一清二楚喇。以當局積壓約一萬宗免遣返聲請個案計算，一年有逾千人被捕，平均每日拉三個以上，比例之高絕對遠超其他所有族群。係人都知，免遣返聲請個案十個着咗九點九幾個都係流嘅，「假難民」之名絕對當之無愧；而喺免遣返聲請人士當中，絕大部分亦係嚟自印度、巴基斯坦以及孟加拉等南亞國家，唔叫「南亞兵團」唔通叫「歐洲兵團」咩！
大家應該記得，早排有機構針對全球各地護照好使好用程度進行排名，結果發現南亞國家護照唔係咁受歡迎，巴基斯坦護照排名更加係倒數第二，得廿幾個國家免簽證咁大把，如果根據政客嘅大愛邏輯，全球其餘一百七十幾個國家或地區無端設限，好明顯喺度玩「抹黑」、「歧視」，應該逐個踩上門抗議至係，點解從未見過佢哋蒲頭呢？
講真，呢班偽善政客嘅謬誤，本來不值一駁，依家連大愛包容嘅祖師爺歐洲都紛紛收緊難民政策，就知道香港再冇條件效婦人之仁，惹火上身，問題係班政客成日阻頭阻勢，港產官僚又吓吓驚畀人標籤種族歧視，於是乎縛手縛腳，退出國際公約唔敢，重起禁閉式難民營又唔敢，即捕即解更加唔敢，香港咪就係咁畀佢哋玩殘囉。
套用特朗普嗰句，本報持續喺假難民問題上發聲，都係「香港優先」，都係為全港市民好，當中包括埋呢班聲大夾冇準嘅偽善政客，萬一佢哋有朝一日慘成南亞兵團打劫非禮強姦嘅目標，咁就唔係咁好喇下話！