開講有話︰新官上任三把火，好似狂人特朗普咁，啱啱宣誓就職，橢圓辦公室張櫈都未坐暖，就拿拿臨推翻奧巴馬醫改，不過呢一幕斷估唔會喺香港發生，事關今屆政府開空頭支票多過食飯，而自願醫保正正就係「彈票」嘅重災區之一，政策從未成事，又何來機會推翻呢？
即係咁，從強制醫保到自願醫保，港府已經講咗N年，最終都係得個吉。原本講好由港府設立五百億元「高風險池」以及其他十二項最低要求，包括有病症可保，吹到係威係勢咁，點知到頭來高風險池暫緩設立，最低要求亦由十二項縮水至十項，主其事嘅食物及衞生局局長高永文更加擺明關人個關，自願醫保計劃只能寄望下屆政府落實咁話。
咁就難怪尋日電台舉行相關論壇，即時變身「追數聲討大會」。有團體話自願醫保對長期病患者吸引力低，佢哋之前統計發現約八至九成長期病患者表示不感興趣，亦有超過九成人相信無法負擔保費；保險業界則估計，標準保單要符合現行十項最低要求，保費會較現時貴一成。其實用膝頭哥諗都諗到啦，政府注資高風險池嘅原意，就係等高風險人士可以用合理價格購買醫保，而其他人亦毋須增加額外負擔，冇咗呢樣嘢，成個自願醫保等於廢咗武功，唔係走數又係咩？
真係愈講愈把火，港府自己唔做好醫療改革，反而一味向市民荷包開刀，夾硬將佢哋推向私營醫療市場，已經畀人狂炳A字膊，點知家陣連市民出雞，佢哋出豉油都縮沙，一啲承擔都冇，仲有冇再離譜啲呀！
當然喇，現屆政府有名你叫「走數大王」，彈票嘅又點止自願醫保吖。正如「東方報業民意調查」顯示，大部分受訪者認為特首任內最後一份施政報告草草收場，蜻蜓點水，要下屆政府幫手埋單，而民生政策更加係炒冷飯，了無新意。
唔使講第樣，淨係講所謂「重中之重」嘅房屋問題就夠。樓價長升長有，市民置業愈來愈渺茫，公屋落成量又遠遜預期，基層上樓愈等愈耐，面對困局，官老爺完全無符，惟有喺籠底摷番發展郊野公園用地出嚟講，咪畀人睇死，最終又係紙上談兵嘅咋。大家有眼見，今屆政府眼高手低、志大才疏，掂邊瓣衰邊瓣，特別係全民退保交白卷，更加畀市民鬧爆呀！
難為特首仲好意思話競選政綱「基本上全部落實」喎，其實啱啱相反，「基本上全部走數」就差唔多。絕大部分受訪者認為並未從施政報告中受惠，狠批港府自欺欺人，證明市民眼睛雪亮。