雖然現屆政府進入夕陽階段，但唔代表可以翹埋雙手混日子，尤其係前財爺鬍鬚曾呢個守財奴去咗跑馬仔，陳茂波冷手執個熱煎堆成為新財爺，冇理由唔開閘放水，有所作為，整番鋪代表作啫。
嗱，尋日就有唔同政黨到政府總部請願，要求即將公布嘅財政預算案善用盈餘，開倉紓困，還富於民。有區議員仲扮成冇鬍鬚嘅財神，寓意新財爺唔好學似前人咁孤寒。咁又係呀，家陣社會問題千頭萬緒，基層固然生活艱苦，就算所謂嘅中產一樣朝不保夕。難得庫房年年水浸，今年財政盈餘隨時高達七百幾億元，你話外界對預算案冇期望就假嘅，爭在新財爺識唔識做嘅啫。
聽吓各大政黨有乜訴求先啦。除咗寬免差餉、寬減薪俸稅及利得稅、寬免公屋租金一個月等例牌菜之外，有政黨仲要求預算案設立居所租金免稅額，事關唔少家庭都係租樓住，租金年年加，真係好吃力；亦有政黨要求財爺增加各項經常性開支，包括全面資助全日制及長全日制幼稚園等。大家都知啦，幼稚園學費貴到飛起，港府話就話今個學年落實免費幼稚園教育計劃，但其實只覆蓋八成幼稚園，擺明走數，如果財爺肯真正落實十五年免費教育咯喎，實贏到唔少父母嘅掌聲o架。
話時話，咪睇鬍鬚曾歷年來派糖使咗唔少錢，實際上都係短期紓困措施，頂多甜一甜嘴巴咋，解決唔到根本問題，結果咪怨聲四起，搞到港府民望趴街咯。呢，現屆政府剩低幾個月貨仔，如果唔想留下太糟糕嘅背影，咁就要抓緊財政預算案嘅最後機會嘞，唔該波叔行多一步，推出多啲長遠措施，真正讓基層受惠。都係嗰句，授人以魚，不如授人以漁，波叔自己都係基層出身，都唔想基層小朋友一世住劏房、N無人士一味望天打卦、公公婆婆日日執紙皮咁慘情o架，吓話？
當然啦，功夫茶嘅意思唔係叫財爺做大花筒亂咁使錢，好似最近嘅候任特首辦話要使成四千萬喎，擺官威多於一切，呢啲開支咪可免則免囉。之但係用於扶貧紓困、推動經濟發展、醫療教育等開支就唔同講法，多多都唔嫌多。正所謂好鋼用在刀刃上，取諸於民，用諸於民，波叔知點做啦。
講開波叔，外界對佢嘅評價非常麻麻，仲有「劏房波」、「囤地波」呢啲諢名添。難得現屆政府臨尾畀隻好牌佢上，如果今次財政預算案做得好好睇睇，留任下屆應該唔成問題。所以話，佢老哥食唔食到胡都係靠呢一鋪，千祈咪好學唔學，學佢個前度咁不知民間疾苦吖！