正所謂，人一走，茶就涼。現屆政府發表任內最後一份施政報告，外界都冇咩期望咯，唯一有少少驚喜嘅係處理假難民方面總算做番些少工夫，好過冇咁啦。不過呢屆政府時日無多，到頭來係咪得個噏字，仲要睇過至知。
大家有眼見，假難民不斷湧港，後果係災難性嘅，唔止成為港府沉重財政負擔，最大鑊係治安急劇惡化。港府都知衰喇，提出多管齊下措施，一方面入境處加快審核酷刑聲請個案，一方面保安局研究修訂《入境條例》，今年首季仲會設立一個輔助名冊同埋成立獨立秘書處，專門處理免遣返聲請審批個案，包括邀請五百多名已受訓嘅當值法援律師加入名冊，預計秘書處成立後，法援署可由每日處理十三宗免遣返聲請個案增加至二十三宗。另外，當局仲話會研究興建禁閉營嘅可行性喎。
即係咁，假難民問題愈演愈烈，弊在港府過去一直扮盲啫，經過本報鍥而不捨踢爆種種亂象，引起社會關注，港府迫於民意壓力終於做番少少嘢，之但係措施係咪到位，政策係咪有效果，就另作別論囉。你話唔係咩，所謂加快審批程序已經講咗N次，不論係港府年前推出嘅「三合一」機制，定係入境處及保安局增聘人手，結果大家都睇到喇，滯留個案不減反增。家陣又話成立名冊，又話開設秘書處，最弊係實際上點運作冇人知，但就事先張揚律師費、文書處理費等將會節節上升，未見官先打三十大板，唔通港府仲嫌用於假難民嘅開支唔夠多咩？
講多無謂，舊年份施政報告一樣話會加快審核程序，一樣話會研究設立禁閉營甚至退出公約，特首梁振英仲大大聲多謝《東方日報》添，結果係點？一年下來，假難民數量不單止冇減少，干犯刑事罪行被捕嘅非華裔人士更創新高達一千五百多人，較前年暴增兩成五，證明當局嘅措施標本都治唔到，簡直嘥氣。
都係古人講得啱，為政不在多言，顧力行何如耳。要徹底杜絕假難民，辦法只有一個，就係從源頭做起。假難民之所以前赴後繼，係因為免遣返聲請好使好用，既可成為滯港護身符，打黑工搵快錢，又可向當局索要人道援助及賠償，甚至勾結黑幫做世界，不知幾爽皮。所以話，港府一日唔退出國際公約，一日繼續為假難民提供湧港誘因，問題就唔使旨意有消失嘅一日。
計功夫茶話齋，豹死留皮，雁過留聲。現屆政府施政承諾走數當食生菜，與其留下歷史罵名，不如鼓起勇氣退出國際公約，切除治安毒瘤，為香港做番件好事啦。