潮流興本土，有人捧場本地波，有人推銷港產貨，有人撐正體字抵制簡體字，有人仲當成政治圖騰宣揚港獨添。其實，真正嘅本土文化唔喺政壇，唔喺商場，而喺民間，嗰啲碩果僅存嘅傳統街頭手工藝咪就係百年香江嘅珍貴歷史遺產囉。
唔係吹水o架，傳統街頭特色工藝歷史悠久，補鞋匠、鐘錶修理匠、鎖匠、磨刀匠、線面師同代書人等堪稱見證香江變遷嘅活化石，近年逐漸受人關注，保育之聲此起彼落，連立法會都正式向港府提出質詢。可能良心發現啩，當局終於補鑊，答覆話食環署正跟進具懷舊本土文化特色嘅街頭工匠發牌事宜喎，仲話短期內會諮詢區議會，如果獲開綠燈，就會研究喺原址或其他適合地點闢設固定攤位，畀已登記嘅工匠申請小販牌照，合法經營。
早就應該咁做喇。隨住現代工業流水作業線大行其道，機械取代人手，傳統街頭手藝逐漸走向式微，線面檔同寫信佬固然無碇企，補鞋、整鎖、修錶等攤檔亦買少見少，如果港府繼續翹埋雙手唔做嘢，任由自生自滅，呢啲傳統行業遲早淪為集體回憶嘅咋。講真，一個城市係咪文明興盛，唔係淨睇摩天大廈嘅高度，仲要睇文化傳承嘅深度，好似意大利嘅皮革手工藝歷久不衰，丹麥嘅手繪餐瓷自成一家，就係最佳例子，港式街頭手藝洋溢東方懷舊魅力，如果規劃得宜，保育得力，唔止可以畀基層市民自力更生，仲可以傳承本土文化，甚至發展成別具特色嘅旅遊景點添，幾正呀。港府捉到鹿都唔識脫角，白白糟蹋珍貴歷史遺產，何止係冇眼光，直頭係冇文化、冇靈魂添喇。
大家有眼見，港產官僚冇嘢叻，最叻倒米，人哋當傳統工藝係寶，佢哋就當係草，唔扼殺業界生存空間已經偷笑咯。食環署驅趕街頭藝人、檢控中環擦鞋匠就係經典例子喇，如果唔係事件引起公憤，全城鬧爆，中環擦鞋匠可能早就被趕盡殺絕，一個不留咯。小市民唔想攞綜援，靠自己雙手自食其力，官僚唔止冇鼓勵，冇提供協助，反而處處打壓，唔怪得民怨直逼臨界點喇。當局家陣至嚟補鑊，遲唔遲啲吖。
點講都好，遲到好過冇到。港府研究為特色工匠發牌，不失為亡羊補牢嘅辦法，千祈唔好又做到唔湯唔水吖。港產官僚大事唔識做，小事做唔好，好事都可能做成壞事，睇吓所謂「美食車」就知喇，一早提出建議，又派人出國考察，整色整水，點知拖到依家影都未見一隻。港府家陣話為傳統工匠發牌喎，大家都係聽住先喇！