陶淵明《桃花源記》記載，秦朝百姓為咗逃避亂世，有人帶住妻兒離鄉別井，搵到一塊與世隔絕嘅人間樂土。今時今日，世外桃源只係童話裏面至有，但移居避亂依然係唔少人嘅選擇，睇香港近年移民熱潮一浪高過一浪就知喇。
港府最新資料顯示，港人移民持續居高不下，去年又有約七千人移居外地，雖然美國、澳洲及加拿大依然係三大首選目的地，不過台灣似乎特別受到青睞，移居寶島嘅港人持續飆升，前年有六百多人蟬過別枝，增幅達兩成，去年八百多人擇木而棲，大升三成，今年睇怕隨時又創新高。移民公司話喎，台灣同香港都係華人社會，兩地語言、文化相近，加上移民門檻同生活指數相對較低，所以吸引到唔少中產人士前往追求理想，開展新生活。
其實，人係故鄉好，月係故鄉明，如果唔係有迫不得已嘅苦衷，邊有人願意離鄉背井，到第二度做二等公民吖，所以話，其他地區條件吸引只係其次，香港唔再值得留戀至係最大原因。大家有眼睇，回歸以來香港家嘈屋閉，雞犬不寧，早就唔係昔日嗰個繁榮之都喇。尤其係佔領之亂，好似打開潘朵拉盒子，法治蕩然固然令傳統核心價值流失，社會撕裂更加導致人與人之間充滿仇恨，家陣仲滋生出極端分離主義添，唔係衝擊就係佔領，唔係放火就係掟磚，唔係造燃燒彈就係造土製菠蘿，保命緊要，移民出走有乜出奇吖。
政治動盪不安，經濟民生亦唔好得去邊。以前香港就算唔係遍地黃金，但總算有啖安樂茶飯食，家陣喺港府無能管治之下，亂象叢生，連飲啖水都可能中鉛毒，你話點安身立命吖。最離譜嘅係，假難民大軍壓境，搞到香港烏煙瘴氣，七國咁亂，當局居然闊佬懶理，乜都唔做，市民要求香港退出聯合國《禁止酷刑公約》，至少重設禁閉營，點不知港府借咗聾耳陳隻耳咁，任由南亞兵團四圍作惡，又斬人，又老笠，又非禮，又販毒，又貼街招勒索，市民連保障人身安全都成問題，咁又點可以安居樂業？點可能唔萌生去意？
國家領導人早前在港警告，如果香港被搞亂咗，大家要一齊埋單，其實只係講啱一半咋，港府官僚薪高糧準兼高牆大屋，戒備森嚴，連條毛都唔會少一條，埋單嘅只係無辜市民嘅咋。講真，如果外國放寬移民條件，香港人即使唔係全部走晒，至少都剩一半空城喇！
家陣嘅香港就好似小說《圍城》所講，假難民千方百計要走入嚟，港人日盼夜盼想走出去，冇條件移民嘅只能坐困愁城，諗起幾咁可悲。
古有哀莫大於心死，今有哀莫大於移民，都係對現實無奈嘅最深感受。唔好話功夫茶悲觀，假難民源源不絕湧來，香港人一個一個離去，終有一日香港會變成真正嘅難民港！