救人一命，勝造七級浮屠，如果離世後依然可以拯救生命，就更加有意義，所以咯喎，捐贈器官確係功德無量（口架），身後仲可以遺愛人間，造福社會，將生命以另一種形式延續落去。
咁香港器官捐贈嘅情況又係點呢？答案係全港現時有二十萬人透過中央登記冊登記成為器官捐贈者，人數話少唔少，但話多亦唔多，相對七百多萬人口，比例只有百分之三咋，遠低於歐美等其他先進國家，以致輪候器官移植嘅病人大排長龍。就講腎臟移植吖，輪候人數累積至近二千人，但每年平均得幾十宗遺體捐贈，病人短則等三五年，長則等十年、二十年，唔少人捱唔到做手術就喺痛苦煎熬中含恨而終。
為咗補鑊，食物及衞生局副局長陳肇始話喎，當局會着力向社會推行生命教育，鼓勵器官捐贈，目標令登記捐贈器官者人數倍增至大約四十萬人。對於有建議改善登記制度，由家陣嘅「選擇捐贈器官」變成「選擇不捐贈器官」，提高捐贈者人口，佢就話持開放態度，稍後會諮詢公眾咁話。
即係咁，中國人一向有死留全屍嘅傳統觀念，即使有人願意過身後捐獻器官，家屬亦未必首肯，成為器官捐贈嘅阻力。隨住社會開放，唔少市民支持器官捐贈，只係為口奔馳而冇登記啫，如果改變登記制度，令佢哋嘅助人心願得到實現，的確值得研究推動嘅。一句到尾，本港捐贈器官者人數未如理想，根本原因係政府推廣不力，唔使講其他，咁耐以嚟政府有冇舉辦過大型宣傳活動吖？有冇官員帶頭登記做捐贈者吖？官員自己都唔以身作則，叫市民點會意識到行動嘅意義呢？平日港府咁鍾意做騷，但係呢類咁有意義嘅宣傳工作又唔做，你話係咪失職吖？
講真，香港人一向愛心爆棚，就睇港府嘅宣傳工夫到唔到家啫。有學者建議，可以豎立紀念牌匾或石碑，刻上器官捐贈者嘅名字，作為其中一項推廣手段，諗得過（口架），當局有冇認真研究過吖？
話時話，塵歸塵，土歸土，人死咗就煙消雲散，不過捐贈器官就唔同嘞，唔止可以挽救別人嘅生命，仲可以幫到佢哋嘅家庭，進而幫到整個社會。大愛無疆，大愛可以超越生死，點係保留一具軀殼可以比擬吖。
一於咁話，大家坐言起行，齊齊支持器官捐贈呢項偉大善行。尤其係港產官僚，平時高薪厚祿卻無所作為，如果承諾身後捐出器官，總算叫做回饋社會，至少證明自己都係有用之身吖！