股神巴菲特有句名言︰「只有退潮嘅時候，至知邊個裸泳。」今時今日經濟不景，百業蕭條，傳媒業更係大吹寒風，呢個時候就見真章嘞，邊個貨真價實，邊個偷工減料，一眼睇晒，呃唔到人嘅！
好似壹傳媒旗下嘅《蘋果日報》咁吖，日前將B疊財經版併入A疊，而C疊娛樂名人版就同E疊副刊合併，實行變相縮版，讀者真金白銀攞七個大洋出嚟，點知攞唔足八両，貨不對辦，唔嬲就假。爛果報今次鬼祟縮版，十足十嗰啲茶餐廳取巧博大霧，乾炒牛河表面售價不變，但牛肉分量減少到幾乎要顯微鏡至睇到，你估消費者傻嘅咩！
冇計喇，衰開有條路，壹淫媒近年經營不善，廣告插水，財政緊絀，惟有一味諗縮數。話時話，年前淫媒旗下宣淫販賤嘅免費報《爽報》冚旗，社會各界熱烈地彈琴熱烈地唱，奔走相告「爽啊！」、「爽死了」，家陣除咗爛果報縮版，旗下其他刊物亦冇運行，摺得就摺併得就併，人手cut得就cut，再次證明善有善報，惡有惡報，若然未報，時辰未到，家陣咪現眼報囉。
唔怕唔識貨，最怕貨比貨，喺嚴峻嘅經營環境下，淫媒節節敗退，日暮途窮，反觀東方報業集團愈戰愈勇，蒸蒸日上，呢啲咪疾風知勁草囉。唔使講咁多，只要將《東方日報》同爛果報揦上手秤一秤，前者重如泰山，內容包羅萬有，後者輕如鴻毛，大風啲都吹到冚包散，根本係蚊髀同牛髀。
當然喇，東方報業集團與時俱進，精益求精，除咗《東方日報》一貫精彩，旗艦網站「on.cc東網」亦緊貼讀者需要，包括直播港超聯足球、本地籃球賽事以至六合彩攪珠，將原來東網港澳、東網大陸及東網台灣三個App合而為一等等，致力提供最快最新最全面嘅資訊，真正做到「上東網，知天下」，難怪大受歡迎，點擊率節節上升喇。
所以話啫，《東方日報》銷量全港冧巴溫，四十年如一日，東網更長期穩佔新媒體瀏覽人數、瀏覽量以及讀者瀏覽時間最長嘅一哥寶座，呢個既係公司同仁努力嘅結果，亦離唔開讀者嘅長期支持。珠玉在側，淫媒形穢，東方報業無論公信力、市場地位抑或廣告效益均遙遙領先，淫媒拍埋去，輸到車尾燈都見唔到。
照咁睇嚟，爛果報縮版都算係「英明決定」，反正佢哋唔係宣淫販賤就係侵犯版權，唔係無中生有就係誣衊誹謗，出紙愈多害人愈多。既然係咁，不如為人為到底，送佛送到西，索性自我了斷，等全港七百萬人爽多次都好吖嘛！