電影《十年》其中一個故事描述將來嘅香港以普通話為唯一官方語言，所有的士司機必須通過普通話測試至可以執業。故事主人翁正因為普通話未達標，事業同家庭雙雙陷入危機。咪以為講古佬靠嚇，唔使幾耐，的士司機可能真係要考語文試，不過唔係普通話，而係烏都語又或者印地語咁解啫。
講起唔知好嬲定好笑，本土派成日擔心香港被「殖民」，話強國人「溝淡」港人喎，點知原來捉錯用神，真正殖民、溝淡香港人嘅唔係十三億強國人，而係源源不絕嘅南亞及非洲人蛇大軍。大家有眼見，港府一味扮鴕鳥，對假難民中門大開，引狼入室，加上司法機構慈悲為懷，對假難民嚟講，呢度好食好住好福利，真正係「香港幾好都有，又點捨得走」，港府咁熱情好客，唔爭先恐後過嚟搵食，點對得住主人家吖。家陣元朗等假難民重災區已經出現「南亞村」、「黑人村」，再咁落去，土生港人遲早淪為「少數族裔」都似。
咁都好嘅，港府管治無能，社會烏煙瘴氣，港人爭住跳船移民，南亞、非洲裔人士正好填補人口空缺。呢，之前試過有提出免遣返聲請嘅女士，滯港期間十年抱九，十足十生仔機器，香港人完全冇得揮。港府鼓勵港人生育失敗，吸納內地雙非童作為人口生力軍，又因反對聲音太大而叫停，唔啱引入南亞及非洲裔人士作為新血吖，反正本土派從來都係「anyone but chinese」，只要唔係強國人，打家劫舍又好，姦淫擄掠都好，屁都唔會放一個，港府推動香港「南亞化」，話唔定阻力細好多。
古語有云︰思則有備，有備無患。既然南亞人遲早成為香港主體民族，家長們好應該未雨綢繆，貴子弟出洋留學，與其去美加澳，不如去印巴孟；大家亦唔好再嘥時間拗咩「英中」、「普教中」，疊埋心水搞「烏教中」、「印教中」同埋「旁（旁遮普語）教中」好過！有辦你睇，早排入境處登廣告聘請少數族裔語言翻譯及傳譯員，月薪高達四萬幾元，可見醫師、律師、會計師同建築師嘅所謂「四師」已經Out晒，烏都語研究至係王道。
話時話，家陣已經係全球化年代，一切都有可能，當「胡」成為意大利米蘭最大姓氏，當非洲移民後裔奧巴馬成為美國總統，當穆斯林當選倫敦市長，有朝一日香港普選出「行政長官辛格（Singh）」，再整個「政務司司長阿卜杜勒（Abdullah），絕對唔係天方夜譚。到時香港特區睇怕都要改名南亞人特區，「一國兩制，港人治港」都要改為「一國兩制，人蛇治港」咯。