考試本來係評核學生能力嘅工具、改善教學質素嘅量尺，但落喺港府廢柴官僚手中，居然淪為施政無能嘅遮醜布、改善教學質素嘅絆腳石，你話係咪荒謬吖？
係咁嘅，俗稱TSA嘅小三全港性系統評估引發爭議，港府死要面子，唔肯全面取消，但又骨頭缺鈣，抵受唔住民意壓力，最終搞咗一個半跪版調整方案出嚟，由全港小學應考改為今年邀請一成即約五十間學校參與。嗱，尋日修訂版系統評估首日開考，結果唔湯唔水，部分學校出席率只有八成，約兩成學生甩底，試場之內空櫈處處，唔知嘅仲以為學生以行為藝術向當局抗議添。
修訂版系統評估只抽一成學校應試，本來已經冇乜代表性可言，家陣連應試學生都唔齊人，就更加反映唔到整體學生嘅真實水平喇。雖然話缺席者大多數係非華語或新移民學生，並非學生中嘅主流，但佢哋始終係本港基礎教育嘅一部分，系統評估殘缺不全，咁仲有乜嘢參考價值？做嚟又有乜意義呢？最驚嘅係，當局明知評估結果有偏差，但一味死撐夾硬照用，咁就大件事嘞。你知喇，錯誤嘅數據必然產生錯誤嘅結論，錯誤嘅結論又會產生錯誤嘅政策，莘莘學子仲畀港府害唔夠咩！
所以話啫，教育官僚真係誤人子弟o架。北方有句俗話，死要面子活受罪，而喺香港，官僚死要面子，受罪嘅卻係千千萬萬嘅學生。講真，呢個半跪版系統評估早就畀人睇死唔掂嘅喇，當局為咗令反對者收貨，居然連任由學生自行決定應試呢條爛橋都諗得出，唔亂龍至奇喇，試問有幾多小學生鍾意考試吖，明年嘅缺席率隨時仲高吖。系統評估家陣騎虎難下，進退兩難，又係一個政策爛攤子。
教育局局長吳克儉得咗個「唔得掂」嘅花名，都算實至名歸咯。嗱，根據最新大學民調，吳局長嘅民望繼續叨陪末座，跌到阿媽都唔認得嗰隻，一啲都唔出奇o架。最諷刺嘅係，吳局長連照顧本地小學生都未掂，居然學人關照外地大學生，好大喜功，孭飛推銷「一帶一路」獎學金喎，咪話畀人睇死，隨時又係跪低收場嘅咋，呢啲咪叫不自量力、自取其辱囉。
一句到尾，系統評估失作用，官僚要面變丟面。計功夫茶話齋，全港最需要接受系統評估嘅其實係班官僚，皆因佢哋渾渾噩噩，無能力又無靈魂，水平隨時可能連小學雞都不如，施政點會唔撞大板吖。當年南郭先生可以濫竽充數，係好彩撞正個昏聵嘅齊宣王，家陣廢柴可以好官我自為之，原因係乜，你明o架喇。