上世紀八、九十年代黑社會橫行無忌，特別係踢（口靚）仔入會，從事販毒打交等非法勾當，更加係害人不淺，當年有套描寫黑社會喺學校收o靚嘅電影，相信大家一定記憶猶新，不過如果大家以為今時今日已經冇呢支歌仔唱，咁就大錯特錯嘞！
前晚凌晨之嘛，警方反黑組喺長沙灣拘捕一名十四歲男童，行動中共起出兩公斤市值八十萬元嘅毒品「K仔」。據講涉事男童早已經輟學，因為經常流連夜店，心急搵快錢而被黑幫「和勝和」招攬運毒；而另一名被捕嘅青年亦隸屬於同一社團。
話時話，黑幫招攬年輕人販毒，早就唔係新聞咯。以和勝和為例，佢哋專門向等錢使嘅青少年埋手，通過提供免費毒品試食導佢哋上癮「升仙」，之後再包飲包食包娛樂，令佢哋對金錢同毒品有所依賴，不能自拔，即係俗稱所謂「養雀仔」，等到時機成熟再威逼佢哋協助集團包裝及速遞毒品，又或者充當「衝關豬」，以螞蟻搬家方式將毒品運到內地、澳門以及日、韓等地。唔講唔知，原來和勝和前坐館「上海仔」郭永鴻除咗有「南亞兵團之父」之稱，仲因為賣「K仔」賣到街知巷聞而有「上海K仔」嘅花朵，問你怕未！
當然喇，黑社會惡行罄竹難書，呢啲只不過係冰山一角咋。早排喺深水埗連傷多名妙齡女士嘅摧花狂魔，令人聞風喪膽，警方繼拘捕一名四十歲無業漢後，日前再拘捕一名廿九歲和勝和分子，佢十一歲離家出走，十五歲加入黑幫，二十歲開始吸冰毒，藏毒、傷人、洗黑錢樣樣齊，案底仲厚過本電話簿，加上吸冰吸到情緒失常，結果淪為辣手摧花男。所以話，毒品同黑社會一樣，真係不可一、不可再o架！
可能有人會問，黑社會毒害青少年，數十年如一日，點解之前好似唔多覺？無他嘅，朝裏有人好辦事吖嘛。正如有學者質疑，隨着警隊高層早前出現人事變動，破獲涉及和勝和嘅販毒案件隨即增加，到底係因為以前特別太平，定係另有蹊蹺？查實上海仔同部分警隊中人關係密切，本報早前就曾獨家踢爆佢同退休高級警司王福林合夥撈世界，仲捲入澳門盜竊巨款及串謀訛騙案添，據講同上海仔狼狽為奸嘅，仲有比王福林退休前高幾級嘅警務人員添。試諗吓，上海仔涉案纍纍作風仲可以咁高調，如果話冇有勢力人士通風報信做守護神，三歲細路都唔信喇！
都係毛伯伯講得啱︰宜將剩勇追窮寇，不可沽名學霸王。警方打擊黑惡勢力，最緊要持之以恒，斬草除根，特別係打殘幕後嘅保護傘，淨係拉幾個少年毒販有鬼用咩！