有人話，第一次犯錯係無知，第二次犯錯係愚蠢，第三次係無可救藥。香港郵政錯而不改，教而不善，醜聞鑊鑊新鮮鑊鑊甘，簡直醫番都嘥藥費！
嗱，香港郵政烏煙瘴氣，亂象叢生，經過本報連環踢爆後，淪為過街老鼠，除咗審計署跟進追殺，立法會政府帳目委員會舊年亦舉行公開聆訊，「公審」郵政署長、商務及經濟發展局局長等多位官僚。前日出爐嘅帳委會報告更羅列香港郵政管理不善、浪費公帑嘅多宗罪，包括數簿年年見紅，郵政基金二十年裏面有八年虧損，十四年達唔到固定資產目標回報率，其中近八成郵局更加蝕到「血流不止」添，可以講係沒有最醜，只有更醜。
話時話，香港郵政管理不善，甩漏多多，有乜法子唔蝕到眼坦坦吖。淨係員工逾時工作咋，一四至一五年就高達一百三十多萬小時，其中近八成以一億七千多萬元超時補水形式補償。如果業務繁忙，前線真係做到冇停手，OT都無可厚非，可惜事實啱啱相反，香港郵政愈做愈縮，人浮於事嘅情況愈來愈嚴重，本報就曾多次揭發有郵政員工集體蛇王呃超時補水，詐病篤數樣樣齊，擺明當納稅人係羊牯。
當然喇，講到浪費公帑，呢啲仲係小兒科咋。好似香港郵政位於中環嘅總部咁吖，係市區罕有地王，極具商業價值，估計地價高達二百億元，香港郵政八五年已計劃搬遷，點知拖足三十年，到依家仲未成事，簡直暴殄天物。
對於香港郵政呢個敗家仔，帳委會報告又係例牌表示遺憾同失望，促請當局從根本檢討香港郵政的運作情況。可惜吖，正如立法會議員話齋，香港郵政先後六次被審計署點名批評，堪稱「審計署長寵兒」，有心改善嘅話就唔會搞成咁喇。所以話，郵政官僚意見接受，態度照舊，要求佢哋查找不足，同對牛彈琴冇乜分別嘅咋。
可能有人會話，郵政服務作為夕陽行業，已經無利可圖。嗱，呢鋪講法要戒喇，新加坡郵政營運模式同香港相似，但人哋改革後年年有錢賺，特別係轉戰區域電子商務物流後，更加做到有聲有色，反觀香港郵政，面對長期虧蝕，唔係諗吓點樣改善服務，開源節流，反而一味諗縮數，唔係縮短郵局服務時間，就係索性摺埋分店。一個積極進取，一個坐以待斃，高下立判。
一滴水睇穿整個世界。香港郵政嘅種種亂象，正正係港府施政無能、胡混度日嘅縮影。難為高官開口埋口民生無小事，唔該管掂香港郵政呢個小小衙門至講喇！