隨着人口不斷老化，老人問題迫在眉睫，今年預算案搞搞新意思，推出以長者為對象嘅「銀色債券」，話就話係一種新嘗試，但實際效果係點，仲要睇過至知。
財政司司長鬍鬚曾係咁講嘅，唔少長者對穩定回報嘅投資產品有需求，為咗鼓勵業界開發銀髮市場，將於今明兩年發行銀色債券，以年滿六十五歲嘅本地居民為對象。政務司司長林鄭月娥亦加把口唱好，聲稱銀色債券可以令有積蓄嘅長者更加放心安享晚年喎。
其實，人口老化係全世界嘅普遍現象，銀髮一族愈來愈受到市場重視，好似日本咁吖，唔少產品及服務專為有經濟能力嘅長者而設，幾受歡迎（口架）。港府有樣學樣，推出銀色債券無可厚非，問題係，一處鄉村一處例，外國受歡迎，唔代表香港亦行得通，尤其係本港老人貧窮問題不斷惡化，究竟有幾多老人家買得起銀色債券，實在令人懷疑。
唔係潑冷水，目前全港貧窮長者有三十萬人咁多，佔老年人口約三成，即三個長者一個窮。好多基層長者臨老唔過得世，要靠執紙皮幫補生計，有位八旬老人家仲要做小巴司機搵食，結果焗斃車廂，簡直係人間悲歌。對於好多基層長者嚟講，幾乎連三餐溫飽都成問題，仲邊有閒錢買債券吖，無論回報幾高，都係得個恨字。
所以話，港產官僚不知民間疾苦，銀色債券隨時曲高和寡。再講吖，買得起債券嘅富貴長者根本唔需要當局操心，最需要照顧嘅係朝不保夕嘅貧窮長者，知冇？
除咗銀色債券，預算案仲提出擴大逆按揭計劃至未補價嘅資助出售房屋，話要為長者退休生活帶來更多保障喎。即係咁，為老人家提供多一個選擇，點都好過翹埋雙手乜都唔做，但如果以為咁就可以解決老人問題，咁就太天真喇。
係人都知，香港缺乏完善嘅退休保障計劃，加上港府安老政策天殘地缺，導致好多長者老無所養，老無所依，淨係靠呢啲小修小補嘅措施，根本止唔到咳。今次預算案話就話喺安老方面着墨唔少，聲稱要加強同優化社區照顧服務，仲話要增加安老宿位同提升質素添，可惜又係小恩小惠，相對於幾十萬貧窮長者，只係杯水車薪咋。
講到底，要令長者無後顧之憂，享受有尊嚴嘅退休生活，全民退休保障計劃至係治本之道。正如有基層長者話齋，銀色債券又好，擴大逆按揭又好，都唔關佢哋事，盡快推行全民退保仲實際喇。可惜吖，港府善財難捨，冤枉甘心，寧願將大量金錢浪費喺工程超支及假難民身上，反而對老人家斤斤計較，連全民退保都唔肯承擔，今次預算案甚至提都唔敢提，問你服未！