古人話，知之非艱，行之惟艱，真係一啲都冇講錯。好似環保咁吖，人人識講，可惜唔係人人識做。唔使講咁多，淨係每年農曆新年過後直接送往堆填區嘅年花就多達千幾噸，可以裝滿六十架雙層巴士，都咪話唔誇張。
其實事在人為，減少浪費，保護地球，唔係咁難嘅啫，只要從日常生活做起，每人行多一步就得。最近有慈善團體開辦以寄賣形式運作嘅環保二手衫店，寄賣者最多可收回三成賣價，結果大受歡迎，開業至今已經累積超過五千名寄賣者，舊年更成功為十三萬件二手衫搵到新主人添。
呢啲咪就係真正嘅環保囉。好多人尤其女士鍾意行街購物，結果買咗一大堆衫，未必件件啱心水，好多新簇簇嘅衣物擺喺衣櫃，長年不見天日，家陣有店舖可以寄賣，推動源頭減廢之餘，仲可以賺番一筆，唔怪得咁受歡迎喇。
正如老一輩教落，做人最緊要有衣食，除咗唔好浪費衣物，更唔可以浪費食物。近年愈來愈多人響應惜食運動，拒絕做大嘥鬼，部分食肆更加主動簽署《惜食約章》，多管齊下減少廚餘，包括喺店內添置分類設施，按訂枱數量預備食材，以及將部分廚餘製作魚糧；亦有學校由以往預製餐盒供應午餐，改為即場按同學飯量派發，總之食得唔好嘥，都幾有成效（口架）。
可惜吖，民間以實際行動環保，反而港府淨係得把口。好似食環署轄下七十五個公眾街市咁吖，每日棄置嘅剩菜多達十四公噸，帶頭做大嘥鬼。咁都未算吖，有團體自發喺公眾街市收集廚餘，點知食環署推得就推，話要喺唔影響街市日常運作嘅情況下至會提供便利喎，你話係咪縮骨吖。唔怪得本港廚餘回收比率遠遠落後其他國家及地區喇，南韓幾乎達到百分之百，反觀香港只有不足百分之一，直頭係蚊髀同牛髀。
莫講話廚餘減廢成效低，「藍廢紙、黃鋁罐、啡膠樽」嘅垃圾分類宣傳講咗足足廿年，咪一樣係有姿勢冇實際。公眾地方嘅三色回收箱大多淪為垃圾桶，牙籤、廢紙、膠羹樣樣齊，大部分係需要直接運去堆填區嘅廢物；反觀唔少私人屋苑回收搞得有聲有色，部分年收入更以十萬元計添。
嗱，咪以為減廢係小事吖。喺溫室效應之下，全球氣候愈來愈反常，香港舊年創出有紀錄以來最熱嘅一年，而今年就錄得五十九年以來最低嘅氣溫，咪就係厄爾尼諾現象作怪囉。有專家警告，如果冰川繼續融化，北極熊遲早因為無家可歸而絕種。其實計功夫茶話齋，如果全球氣溫繼續上升，北極熊絕種事小，人類面臨生存危機事大吖！