正所謂，人無我有，人有我優。東方報業集團旗艦網站「on.cc東網」與時俱進，精益求精，對於讀者嘅需要，我哋一向跟得最貼，如果唔係，就唔會創出咁多傳媒界先河喇。
呢嗱，話口未完又有新猷嘞。隨着本地籃球球季正式開鑼，由昨日開始，東網獨家直播本地籃球賽事，而打響頭炮嘅係東方大戰永倫。今季本地籃壇三強鼎立，其中傳統勁旅南華及永倫近年一直鬥得頭崩額裂，今季更有全面推動職業化嘅東方籃球隊加入戰團，三方混戰，精彩可期，東網除咗全程直播賽事，仲請來名家評述同分析，各位籃球迷又點可以錯過呢？
咪話功夫茶賣花讚花香，東網直播本地籃球賽事，唔止球迷大呼過癮，一眾職業球員亦拍爛手掌。正如東方隊嘅老大哥香振強話齋，本地籃球賽事經常爆滿，好多球迷想觀賞比賽都未必入到場，有咗東網直播，就可以滿足晒所有球迷嘅願望嘞。
話時話，港府開口埋口支持本地體育發展，其實姿勢大過實際，點似得我哋東網咁講到做到！直播本地籃球賽事固然飲頭啖湯，直播港超聯賽事，亦係東網首創。大家睇吓港隊參與世界盃賽事場場爆滿，就知本地波愈來愈受歡迎。冇錯嘞，潮流興講本土，香港人睇香港波，自然多老友記捧場。
東網話明與時俱進，精益求精，梗係周不時搞搞新意思喇。直播六合彩攪珠以及將《東方日報》、《太陽報》內容原汁原味放上網，通通都係東網首創。至於話功能革新咯喎，東網更加係不遺餘力，唔使講第樣，淨係最近登場嘅三合一東網APP，將原來東網港澳、東網大陸及東網台灣三個APP合而為一，讀者一APP在手，就可以盡覽唔同地區嘅新聞資訊，可以隨時切換之餘，仲可以選擇以繁體或簡體字顯示，既方便又快捷，真正做到「上東網，知天下」。當然喇，不得不提嘅仲有「推播通知」（Push Notification）設定功能，讀者可以自主選擇接收推播通知，新聞、娛樂、財經、體育及生活任君選擇，又特設靜音模式，切合唔同讀者嘅需要，夠晒周到。
所以話，有麝自然香，東網長期穩坐新媒體一哥寶座，無論瀏覽人數、瀏覽網頁數抑或瀏覽時間都贏足競爭對手九條街，證明讀者眼睛係雪亮嘅。
始終都係嗰句，讀者嘅支持就係我哋進步嘅原動力。東網仝人一定會繼續努力，力臻完美，推出更大更多嘅驚喜，各位記得繼續黐實我哋喇！