近年立法會拉布成風，搞到議會空轉，工程受阻，估唔到依家仲大鑊，隨時連隧道及交通都癱瘓埋，問你怕未。
係咁嘅，東區海底隧道專營權今年八月七日屆滿後將由政府接管，本來係一件好事，可惜由於東隧條例草案仲未獲立法會通過，到時當局無法律基礎向通過東隧嘅車輛收費，車流量將會大增不特止，分分鐘影響埋連接道路，引起交通大混亂。
運輸署官員話喎，如果條例草案無法喺今個立法年度內通過，就要被迫免費開放東隧，每日車流量料增加三萬四千架次，導致東九龍早晚繁忙時間嘅車龍延長二百米至五點九公里不等，其中以觀塘繞道及觀塘道最嚴重；而東區方面嘅車龍亦將會延長七百米至四點六公里不等，相關地區嘅道路隨時塞爆。
更嚴重嘅係，如果交通情況惡化到東隧被視為不安全或不適合車輛通過時，當局可能要封閉東隧及其連接道路，每日使用東隧嘅七萬五千架次車輛大多會轉用紅隧，令本已日日擠塞嘅紅隧雪上加霜，港九交通想唔癱瘓都幾難。正如有司機話齋，分分鐘要塞多兩至三個鐘都似。
唔係靠嚇o架，有立法會議員警告，受到拉布影響，東隧條例草案勢必無法如期通過，如果當局冇後備方案，禍害可能比佔中更嚴重。咁又係吖，東隧係港島東及九龍東主要交通幹道，淨係去年十一月，來往東隧嘅私家車就有一百三十萬架次，的士亦有四十七萬架次，萬一真係要封閉，後果有幾嚴重，估都估到喇。
講起唔知好笑定好嬲，過去東隧每次加價都搞到滿城風雨，本來以為港府收回專營權就一了百了，既可以重新檢討收費，亦可以重新分配幾條隧道嘅車流量，點知依家連條例草案都過唔到，隨時要被迫封閉，你話係咪荒謬吖。
所以話，一損俱損，立法會拉布唔止阻礙工程，更加阻住地球轉。立法會財委會及工務小組依家仲積壓咗七十幾項撥款申請，包括長者醫療券等多個民生項目，睇怕都幾難趕及今個立法會年度內通過。財委會主席向港府建議加開會議，將具爭議及無爭議嘅撥款項目分開，實行「雙線」審議，希望加快進度，本來不失為權宜之計，可惜吖，如果反對派唔肯配合，繼續玩嘢，講乜都冇用喇。
唔使講咁多，淨係高鐵工程追加撥款就有排搞，港府話就話繞過工務小組直接向財委會申請，而財委會亦有意加開會議審議，但喺重重阻力之下，究竟可唔可以趕及本月底前通過，只能望天打卦，港府打定輸數都得咯。
冇法子喇，今日香港頭頭碰着黑，政府無能，政客無良，大家累鬥累，何止塞爆東隧咁簡單，遲早拖死香港吖！