成語「養癰遺患」解作生咗毒瘤唔醫治，必將後患無窮。呢，香港假難民問題尾大不掉，咪就係養癰遺患嘅現實例子囉。
新一份財政預算案披露，來年處理免遣返聲請嘅預算開支最少十四億元，連同法律支援等，合共要花逾十七億元公帑。淨係人道援助開支都要八點三億元，較本年度激增一點五倍；餘下五點八四億元則用作全面檢討聲請策略、加快處理聲請及上訴個案，都咪話唔誇張。咁搞法，港府就算有金山銀山都遲早被掏空喇，正如「東方報業民意調查」顯示，多數受訪市民直斥港府浪費公帑養毒瘤，最後由納稅人填氹。
咁又係吖，預算案被人批評離地，對基層市民斤斤計較，唯獨對假難民就咁慷慨，開支年年大增，係人都有火喇。講起都閉翳，預算案預測來年經濟只有百分之一至二升幅，唔少市民擔心分分鐘出現負增長，生活百上加斤，面對咁嘅時勢，港府對水深火熱嘅基層市民愛理不理，反而對假難民百般禮待，唔止大開中門，自出自入，仲大開水喉，任人予取予求，呢啲咪叫幡杆燈籠照遠唔照近囉。
正所謂，綿綿不絕，必有亂結，假難民問題唔止成為公共財政嘅大包袱，而且成為社會治安毒瘤，販毒、搶劫、貼街招勒索等等，簡直無法無天。有人慨嘆「人蛇滾滾來，罪案密密爆」，真係一啲都冇講錯。
係人都知，多數假難民先去內地，然後偷渡來港，淨係過去一周廣東省邊防部門就連破多宗外籍人士偷渡案，分別喺東莞、茂名等地截獲八十幾名外籍人蛇，其中六十幾人來自東南亞地區，佢哋話就話喺內地做黑工，其實係伺機「換水」偷渡來港，再藉提出酷刑等免遣返聲請留港犯案。所以話，想徹底解決假難民問題，一定要加強兩地合作，如果淨係靠香港堵截，只會愈堵愈多嘅咋。話時話，如果唔係東方報業集團發揮第四權監察功能，持續踢爆假難民問題，港府可能到依家仲係不知不覺吖。
講起真係諷刺，港府來年處理假難民嘅開支大幅上升，反而針對本港市民嘅紓困措施只係象徵式增加四十四億元，其中公屋戶以及綜援、生果金和長者生活津貼人士受惠仲少咗添，你話係咪本末倒置吖？唔怪得多數受訪者表示失望，認為港府有趨勢削減一次性措施，令基層市民百上加斤。
總而言之，家陣社會紛擾，經濟低迷，民生凋敝，香港已經自顧不暇，加上假難民氾濫成災，想唔七國咁亂都幾難。港府究竟幾時至肯真真正正切除呢個毒瘤呢？